Nunatta qulaani silaannaap nakkutigineqarnera namminersorlutik oqartussat tiguniarpaat
Ullumikkut Kalaallit Nunaata qulaani silaannarmi 19.500 fodit sinnerlugit qutsissusilimmi timmisartut angallannerat Islandip Canadallu aquppaat
Naalakkersuisoqatigiit nutaat isumaqatigiissutaat »Siuariartorneq, patajaassuseq toqqissisimanerlu« naapertorlugu partiit naalakkersuisoqatigiit pingasut, Siumup, Demokraatit aamma Nunatta Qitornai-sa »silaannakkut angallannerup, silasiornerup upalungaarsimanerullu naalagaaffimmit tiguneqarnissaanik periarfissat« misissussavaat, Sermitsiaq allappoq.
Oqartussaaffiit nutaat tiguneqarnerisigut kinguneqaatissat misissorneqarneranni ineqarnermut attaveqarnermullu Naalakkersuisoq Karl Frederik Danielsen qitiusumik inissisimavoq.
Silaannakkut ingerlatsisorpassuit
– Akisussaaffiit oqimaatsuupput Kalaallit Nunaannut pingaarutilerujussuit, taamaattumillu tigutinissamik politikkikkut aalajangerneq paasinninnermik tunngaveqassaaq. Tassami tigusiinnarnissaq pineqanngilaq, pineqarporli suliassanik nutaanik, siusinnerusukkut Kalaallit Nunaanni ingerlassimanngisatsinnik, naqqaterpiaanit ineriartortitsinissaq, Karl Frederik Danielsen Sermitsiamut oqarpoq.
Kalaallit Nunaata qulaani silaannaap nakkutigineqarnera ajornakusoortuuvoq nunanit arlalinnit ingerlatsisorpassuaqarluni, tamannalu nunani tamalaani sakkortuunik malittarisassaqarpoq.
Kalaallit Nunaat qulaallugu 19.500 fodit ataallugit timmisartorneq akeqanngilaq. 19.500 fodit ataallugit silaannakkut angallannerup aqunneqarneranut atatillugu aningaasartuutit naalagaaffimmit kisimi akilerneqartarput, aningaasartuutillu naalagaaffiup ingerlatsiviinit marlunnit, Naviair-imit aamma Danmarks Meteorologiske Institut-imit, DMI, avinneqartarput.
19.500 fodit qulaallugit silaannakkut angallannerup aqunneqarneranut atatillugu aningaasartuutit akitsuutinit akilerneqartarput, timmisartut Kalaallit Nunaannik qulaassinerminnik akiliutigisartagaannik.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: