Nunatta Qitornai: Kommuninik 17-inik pilersitsinissaq sulissutigaarput
Vittus Qujaukitsoq isumaqarpoq inuiaqatigiit aaqqissuussaanerannik aalisarnermillu allanngortitsilluinnarneq namminiilivinnissamut tunngavissaasut. Tamanna qinigaaffiit marluk ingerlaneranni anguneqarsinnaavoq, tamatumalu kingorna avissaarnissamut aqqut ammassalluni
Partiimi nutaami Nunatta Qitornaani siulittaasoq, Vittus Qujaukitsoq, uani sapaatip-akunnerani AG-mi apeqqarissaarfigineqarpoq.
AG: Namminiilivinnissaq pilllugu oqallinnermut isiginnittaasersi Siumumit qanoq allaanerussuteqarpa?
- Isumaqarpunga allaanerussut inuiaqatigiit aaqqissugaanerannik allanngortitserusutsinnik qineqqusaarutiginninnitsinniittoq. Kommunit aamma Namminersorlutik Oqartussanut suliassanik nammagassanillu agguataarineq pingaarnertut isiginiassavavut. Kommuninik aaqqissuusseqqinneq kommunerujussuarnik pilersitsiviusoq iluatsinngitsoorsimavoq – ajutoorfiusimavoq. Akisussaaffinnik nuussisoqarsimanngilaq suliassanillu agguataarineq atorsinnaanngitsumik ingerlalluni. Taamaattumik qanimut oqartussaaqataaneq atuutinngilaq innuttaasullu qinikkanut attaveqarnermik annaasaqarsimallutik.
AG: Namminiilivinnissamut atatillugu sooq tamanna taama pingaaruteqartigaa?
- Innuttaasut kommunini aqutsinermut qanimut attuumassuteqarnissaat pingaaruteqarmat, kommuneqartariaqaratta nunassittarnermik pioreersumik aallaaveqartumik. Inoqarfinnik minnerusunik ullumikkut ersinngitsumik inuerussaasoqarpoq, tamannalu peqataaffigisinnaanngilarput. Taamaattumik aaqqissuussaaneq aallaanerulluinnartoq kommuninik 17-inik innuttaasunik qanimut sullissinermik kivitsinissamut piginnaaneqartunik pilersitsinissamik sulissutiginniffigisarput kissaatigaarput.
Partiimik pilersitsisup Vittus Qujaukitsup apersorneqarnera tamaat AG-mi uani sapaatip-akunnerani saqqummertumi atuaruk, tassanilu Nunatta Qitornaasa suut qineqqusaarutigineraat tusagaqarfigilaarsinnaavat. Aviisimut isissutissamik uani ataani linki tooriarlugu pisisinnaavutit: