Nunatta oqaluttuassartaanut ilanngutilersoq: Isit nakorsaat siulleq ilinniakkaminik naammassinningajalerpoq
Nakorsat kalaallit siullersaata ilinniakkaminik naammassinninneranit ukiut 45-t qaangiuttullu, maanna kalaallimik – immaqa marlunnik – isinut nakorsaqalissaaq. Taakku atorfissaqartinneqaqaat.
Nunarput isit nakorsaannik ukiorpassuarni amigaateqarpoq. Maannali isit nakorsaat kalaaleq siulleq ilinniakkaminik naammassinningajalerpoq.
Taannalu atorfissaqartinneqarluassaaq.
Nakorsaq inuusuttoq Nick Duelundimik ateqarpoq, taassumalu Nunatsinni isit nakorsaatut ilinniagalinni siullersaanissani ilungersuutigaa. Nakorsatut immikkut ilinniakkami naammassinissaanut ukioq ataaseq suli amigaatigaa.
Piffissami matumani meeqqat isimikkut ajornartorsiutaannut ilisimatusarluni suliniummik annerusumik suliaqarpoq. Ph.d.-liorluni maanna aallarteruttorpoq. Taamaattumillu ilisimatusarnermik ukiuni arlalinni aallutaqarpoq – tamatumalu kingorna isit nakorsaattut naammassisussaalluni.
Nakorsat inuusuttut allat assigalugit Duelund Danmarkip illoqarfigisamilu Nuup akornanni uteqattaartarpoq.
Nunatsinni isit nakorsanngorniarluni ilinniarnissamut periarfissaqanngilaq. Taamaattumik Nick Duelund Aalborgimut nuulluni immikkut nakorsanngorniarluni ukiut siulliit sisamat ilinniartuuvoq.
Ukiuni aqqaneq-marlunni ilinniartoq
Nakorsanngorniarnini Aarhus Universitetimi ingerlassimavaa. Tamannalu ukiunik arfineq-marlunnik sivisutigaaq. Taakku saniatigut immikkut nakorsanngorniarluni tassa ukiuni tallimani ilinniagaqaleruttorpoq.
- Nakorsanngorniarnera naammassigakku Nunatsinnut uteqqikkusukkama. Nuummi Sanami ukiut pingajuisa affaani nakorsatut sulivunga. Taama sulininni isit nappaataat soqutigisorujussuanngorpakka. Napparsimmavissuarmi isinut aalajangersimasumik nakorsaqanngilaq. Ilaanneeriarlunili Glostrupimi napparsimmavissuarmit isit nakorsaannik suliartortoqartarluni.
- Takusinnaasattut pisariaqartitsisoqartorujussuuvoq, napparsimasummi arlallit ilungersunartunik isimikkut ajornartorsiuteqaramik. Qarasaasiakkut nakorsiartitsineq aqqutigalugu Glostrupimut ulloq unnuarlu ikiortissarsiorluta saaffiginnissinnaasarpugut. Nunatsinnili aalajangersimasumik ataatsimik ajornanngippallu arlalinnik isinut nakorsaqartariaqaraluarpugut, Nick Duelund oqarpoq.
Allaaserisaq tamaat AG-mi uani sapaatip akunnerani saqqummertumi atuaruk. Uani isissutissarsigit:
