Nunatta nakorsaanera: Tunillanneqarsinnaanngitsut amerlammata tunillaassuineq unikaallaqqavoq
December 2021-mi aamma ukioq manna qaammatini pingasuni siullerni tunillaassuuttoqarujussuarnera pissutigalugu Covid-19-imik qaammatini tullerni tunillaassuuttoqarujussuaqqittoqassagunanngilaq, Nunatta nakorsaanera isumaqarpoq.
Nunatsinni Covid-19-ip tunillaassuunnera eqqarsaatigalugu april eqqissisimanerusimavoq. Qaammammi ataatsimi inuit katillugit 227-it PCR atorlugu misissorneqarsimapput. Taakkunannga 40-t tunillatsissimasut paasineqarlutik. Tunillatsissimasut procentinngorlugit 17,6 procentiupput.
Nunatta nakorsaanera Henrik L. Hansen taama ilisimatitsivoq oqarlunilu nunatsinni tunillaassuunneq eqqarsaatigissagaanni pissutsit eqqissisimanarluinnartut.
- Akiuussusertissimasut amerlalluinnarneri aamma december 2021-miit marts 2022 ilanngullugu tunillaassuunnerup annertunerpaaffissimanera pissutigalugit qaammatini tullerni annertunerusumik tunillaassuuttoqarnaviarunanngilaq. Nunarsuup sinneranut sanilliullugu tunillaassuunnerup qaangernissaanut siuarsimanerujussuuvugut, Henrik L. Hansen Sermitsiaq.AG-mut oqarpoq.
December 2021-miit marts 2022 ilanngullugu Covid-19-ip tunillaassuunnera annertunerpaaffissaminiippoq. Ullut ilaatigut tunillatsissimasut 200-t sinnertarlugit, napparsimmavinnilu uninngasoqartalerluni.
Aprilimi marluk uninngasimapput
Ullumikkut pissutsit allaanerulluinnarput, sulili tunillatsissimasoqallattaasarpoq. Tunillaassuunnerli nunanit allanit angalasunit nunatsinnut eqqunneqarnerusartoq, nunatta nakorsaanerata maluginiarpaa.
Nunatta nakorsaaneqarfiata kisitsisaatai naapertorlugit Covid-19-imik tunillatsissimasut marluk napparsimmavimmi aprilimi uninngasimapput. Uninngasut tamarmik Nuummiipput. Coronamik tunillatsissimanerup nalaani toqusoqartoqarneranik nalunaaruteqartoqarsimanngilaq, toqusimasulli tamarmik coronamut attuumassuteqarsinnaaneranut tunngatillugu misissuinerit suli naammassineqanngitsut, Henrik L. Hansenip ilisimatitsissutigaa.
Nunani allani tuniluunneq ernumagineqarpoq
Nunatsinni tunillaassuuttoqanngikkaluartoq, taamaattoq nunani allani tunillaassuunneq nunatsinni oqartussanit nakkutigeqqissaarneqarpoq.
- Covid-19-ip oqaluttuaannaalernera suli tikeqqajanngilarput. Ukiamut akiuussusersueqqilernissaq oqallisigineqaleratarsinnaavoq, tamannali maannakkorpiaq aalajangerneqarsinnaanngikkallarpoq, oqarpoq.
Kinami Covid-19-imik tunillaassuineq aprilip naalernerani annertuseriarujussuaqqippoq.
Nunatsinni akiuussusertissimasut:
- Innuttaasut 74 %-ii ataasiarlutik kapitissimapput
- Innuttaasut 69 %-ii aappassaat kapitissimapput
- Innuttaasut 40 %-ii pingajussaanik kapitissimapput