Nunatta Nakorsaanera: Taamaammat matusivinngilagut
Oqartussat isumaqarput, Nuummi tuniluuttoqarnerani peqqinnissatigut tunngavissaqanngitsoq Nunatta matuneqarnissaanut aamma tikinniartunik unitsitsivinnissamut.
Nunatta Nakorsaanerata Henrik L. Hansenip nassuiaatigaa, ullumikkut pissutsit ukiup aappaata affaata matuma siornanut sanilliullugu allaanerulluinnartut.
- Innuttaasut mianernarnerpaat maanna akiuussutissalerneqareerput, matusivinnginnitsinnut tamanna pissutaavoq. Matusivissaguttami inuiaqatigiinni siunertarineqanngitsumik allatigut kingunerluuteqartussaavoq, nunatsinni nakorsaaneq oqarpoq.
Tuniluuttoqarnera akuerisariaqarparput
- Maanna inissisimanerput eqqarsaatigalugu nunami maani tuniluuttoqarnera akuerisariaqarparput. Coronat allat nutaat atuutilersimanerat pissutigalugu nunami tuniluuttoqalernera pinngitsoortissinnaanngilarput. Tuniluuttoqarnerali killilersimaarniarlugu suliniutinik suli pilersitsisassaagut. Akuerisariaqarparpulli nunami tuniluuttoqarnera, Henrik L. Hansen tusagassiortunik katersortitsinermi erseqqissaavoq.
Naalakkersuisut Siulittaasuata Múte B. Egedep erseqqissaatigalugu oqaatigaa, peqqinnissatigut sulisut nalilersuisarnerat tunngatillugu killilrsuutissat suliarineqartassasut, aamma nunarsuarmi tamarmi tuniluunnerup qanoq siaruaassinnaanera aamma tuniluuttoqarnerulersinnaanera qanoq pinngitsoortinneqarsinnaanersoq ilisimaneqarnerulersimasut.
Dronningip tikeraarnissaa
Dronning Margrethep qaammammi matumani kingusinnerusukkut tikeraarnissaa eqqarsaatigalugu Múte B. Egedep oqaatigaa, pissutsit ajornerulissappata killilersuutinik nutaanik atuutsitsilertoqarsinnaasoq.
- Inuilli 20-t kisimik katerissinnaanerannut piumasaqaat dronningip tikeraarneranut atatillugu aamma atuutissaaq.