Nunatta nakorsaanerata kaammattuutigaa ukiuni kingullerni 'spiralilertissimagaanni' naammagittaalliortoqassasoq
Tuluit tusagassiorfiata BBC-p spiralilertissimasumik oqaluttuaq saqqummiummagu, Nunatsinni Nakorsaaneqarfimmit kaammattuutigineqarpoq, arnat akuerseqqaaratik ukiuni kingullerni spiralilersorneqartarsimasut allatulluunniit naartunaveersaaserneqartarsimasut naammagittaalliuteqarnissaat kaammattuutigineqarpoq.
Nunatsinni Nakorsaaneqarfimmit oqaluttuaq Tuluit tusagassiorfiata BBC-p saqqummiussimasaa maanna qisuariarfigineqarpoq.
Tassani arnaq kalaalleq oqaluttuarpoq, nalusaminik aamma akuersitinneqaqqaarani spiralilertissimalluni. Arnaq pineqartoq isumaqarpoq, 2004-mi naartuersinnerminut atatillugu spiralilertissimalluni. Ukiorpaaluit qaangiummata arnap naartorusukkaluarluni naartulerneq ajulerami misissorneqarami spiralilertissimalluni aatsaat paasisimavaa.
Arnap pineqartup taamaammat kissaatigaa, spiralilersuisoqarsimaneranik suliaq misissuiffigineqartoq annertusillugu, ukiup 1991-ip kingorna, Namminersorlutik Oqartussat peqqinnissaqarfimmik Danmarkimit tigusisimanera ilanngullugu misissuisoqassasoq
Nunatsinni Nakorsaaneqarfimmit tusagassiorfitsigut nalunaaruteqarnermi ilisimatitsissutigineqarpoq, suliaq ilungersunarluinnartutut isigineqartoq:
Pisoqalisoornissamut piffissaliussaq qaangiussimasoq
- Suliat pineqartut Nunatta Nakorsaaneqarfianit ilisimaneqanngillat. Taamaakkaluartoq suliaq ilungersunartorujussuartut isigaarput. Akuersititseqqaarnani katsorsaasoqartarsimappat suliassaq ilungersunartuussaaq malitseqartinneqartariaqartoq, nakorsaaneqarfimmit arnat naammagittaalliornissaannik kaammattuuteqartumit allapput:
- Arnat akuerseqqaaratik ukiuni kingullerni spiralilersorneqartarsimasut allatulluunniit naartunaveersaaserneqartarsimasut naammagittaalliuteqarnissaat kaammattuutigineqarpoq suliassat misissorneqarsinnaaniassammata, nalunaarummi allassimavoq.
Nakorsaaneqarfimmit ilanngullugu ilisimatitsissutigineqarpoq, suliamut pisoqalisoornissamut piffissaliussaq qaangiutereersimagaluartoq naammagittaalliuutigineqartut misissorneqassasut.
Sullinneqarnerit tamarmik akuerineqarsimasussaapput
Nunatsinni Nakorsaaneqarfimmit erseqqissaassutigineqarpoq, peqqinnissaqarfimmi katsorsarneqartussat tamarmik akuerseqqaartussaasut:
- Tassa imaappoq katsorsaatigineqartussaq katsorsarneqartussamit akuerineqaqqaartussaavoq. Tamatuma saniatigut katsorsartittussat katsorsartinnissaq aallartitsinnagu katsorsaatigineqartussap iluaqutissartai ajoqutigisinnaasaalu tassunga ilanngullugit kingunerluutigisinnaasat pillugit erseqqissumik ilisimatinneqartartussaapput, Nunatsinni Nakorsaaneqarfimmit allapput.
Nammineq oqaluttuarusuppit
Sermitsiaq.AG-p arnat ukiuni qaninnerusuni ilisimatinneqaqqaaratik akuersitinneqaqqaaratilluunniit spiralilertissimasut allatigulluunniit naartunaveersaatilerneqarsimasut aamma tusarfigerusuppai.
Aaqqissuisoqarfiup kinaanerit ilisimasariaqarpaa, allaaserisanili saqqummersuni kinaassutsinnik isertuussisinnaatitaanerit ammaffigalugu.
Arnat naartunaveersaatilertinneqarnermut tunngatillugu eqqunngitsumik misigisaqarsimasutut misigisut, oqaluttuarusussinnaasullu aaqqissuisoqarfimmut mailerlutik saaffiginnissinnaapput. Mail: redaktion@sermitsiaq.AG