Covid-19-imik tunillatsissimasut amerlanerpaartaat Omikronimik tunillatsissimapput. Misissuinerit arlallit Danmarkimut nassiunneqartarnerani tamanna ersertoq, nunatta nakorsaaneqarfiata nittartakkamini paasissutissiissutigaa. 

Covid-19-eqarluni toqusoqaqqippoq. Utoqqaq Dronning Ingridip Napparsimavissuani uninngorsoq ippassaq sapaami februaarip 20-ani toquvoq. 

- Covid-19-imik pingaarnertut napparsimalluni toqunngilaq, kisianni toquneranut peqqutaaqqataasinnaavoq. Maanna nuna tamakkerlugu 13-it Covid-19-eqarlutik Covid-19-imilluunniit toqquteqarsimapput. 

Unittut nutaat sisamat angerlartut qulingiluat

Nuummi Covid-19-eqarlutik unittut nutaat tallimanngormamiit pingasunik ilapput. Taakkunannga ataaseq angerlartitaareerpoq. Qaqortumi tunillatsissimasumik nutaarmik ataatsimik unittoqarpoq. 

- Covid-19-illit qulingiluat sapaatip akunnerata naanerani angerlartinneqarput mattusimatinneqarunnaarlutillu. Nuummi sisamat, Sisimiuni pingasut, Qaqortumi ataaseq Narsamilu ataaseq. Nunatta nakorsaaneqarfia paasissutissiivoq. 

Taamaasilluni ullumikkut februarip 21-ani Covid-19-eqarlutik uninngasut nuna tamakkerlugu 16-iupput. Nuummi pingasut uninngapput, Aasianni marluk, Nanortalimmi marluk, Sisimiuni ataaseq Qaqortumilu ataaseq. Avannaani Covid-19-imik tunillatsissimasumik uninngasoqanngilaq.

- Uninngasut marluk Covid-19 pingaanertut uninngassutigaat (Kategori 1). 

- Uninngasoq ataaseq Covid-19-imik tunillatsissimaneq allamik nappaateqarnermut sunniuteqarpoq. Kisianni nappaat alla pingaarnertut uninngassutaalluni (Kategori 2).

- Uninngasut arfinillit Covid-19 pingaarnertut nappaatiginagu uninngapput. Taakkununnga covid-19 uninnganeranut annertunerusumik sunniuteqanngilaq (Kategori 3). Nunatta nakorsaaneqarfia kisitsisit nutarterneqarnerini taama paasissutissiivoq.