Nunatta nakorsaanera: Misileraatit nutaat sulinermut oqilisaataapput

Misileraatissat 5.000-it nunatta amerikamiut suliffeqarfiutaannit Cepheidimit pisiai, covid-19-imut misissuinissamut sulinermut oqilisaassapput. Atortunik sinerissami atorneqarsinnaasunik pisinissaq misissorneqarpoq.

Nuummi qitiusumik misileraavik qaammat kingulleq pilersinneqartoq, maanna matussaaq. Misiliutit atortuni, Nuummi pigineqareersuni peqqinnissaqarfimmilu sulisunit ilisimaneqarluareersuni, maanna misissorneqartalissapput.

- Atortut siuarsimalluinnarput peqqinnissaqarfimmilu sulisunit ilisimaneqareerlutik. Akikinnerullutillu. Qitiusumik misileraavik atorsimasarput akisoorujussuusimavoq, immikkut ilisimasallit qulit nunanit allaneersut tikisillugit suliartortittariaqarsimagatsigit, Henrik L. Hansen Sermitsiaq.AG-mut oqarpoq.

Misileraatit nutaaq ataaseq 518 koruuneqarpoq, saniatigullu Nuummut silaannakkut assartorneqarnermut aamma akiliuteqassalluni. Henrik L. Hansen ilisimatitsivoq Amplexa A/S, qitiusumik misileraavimmut tunngatillugu isumaqatigiissuteqarfigineqarsimasoq suli naatsorsuusiorsimanngilaq, taamaammallu akiligassaq qanoq annertutiginersoq suli ilisimatitsissutigisinnaanagut.

Nakorsiartut siornatigutulli misissorneqartassapput, tassa torlukkut aamma sorlukkut misiliutissamik tigusiffigineqartassallutik. Misiliutip tiguneqartup qanoq misissornissaa maanna allanngorpoq, misileraatit atortunut pigineqareersunut atorneqarsinnaammata.

Misiliutillu tiguneranit akunnerup ataatsip ingerlanerani akissutisinissaq naatsorsuutigineqarsinnaavoq.

Atortut sinerissami atugassat

Nunatta nakorsaanera ilisimatitsivoq atortunik misiliutinik misissuisartussanik sinerissami atorneqarsinnaasunik pisinissamut maanna misissuisoqartoq.

- Imaaliallaannaq pisiarineqarsinnaanngillat, atortut taakku nunarsuaq tamakkerlugu tamanit maanna pisiarineqarusummata. Atortut mikinerumaartut sinerissami atorneqarsinnaasut pisiarinissaannut suli suliniuteqarpugut, oqarpoq.

Tamassuma tungaanut misiliutit Nuummi misissorneqartassapput.

Kalaallit Nunaanni covid-19-imik qaammat sinnerlugu napparsimasoqanngilaq, napparsimasoq paasineqartoq kingulleq martsip naanerani misiliummik tigusiffigineqarsimalluni. Covid-19-imik napparsimasimasut aqqanillit tamarmik maanna peqqissereerput, napparsimanerminnilu napparsimavimmut unitsinneqarnissamik pisariaqartitsisimanatik.

Powered by Labrador CMS