Nunatta Nakorsaanera: Alla nutaaq tunillatsissimavoq, inuiattullu ullorsiornermi allanut qanillinaveersaarnissaq eqqaamallugu
Arfininngormat Nuummi misissuisoqarnerani inuk alla tunillatsissimasoq paasineqarpoq. Taamaattoqarnissaa naatsorsuutigineqareerpoq, Nunatta Nakorsaanera inuiattut ullorsiornissaq sioqqullugu coronamut atatillugu innersuussutinik eqqaamanneqqusisoq oqarpoq.
Nuummi innuttaasorpassuit arfininngormat coronamut misissortipput, tassanilu inuk ataaseq tunillatsissimasoq paasineqarluni, Nunatta Nakorsaanera Henrik L. Hansen ilisimatitsivoq.
Sapaatip akunnerata naanerani kingullermi inuit kaffillertunut apersortittunullu qaasimasut coronamik tunillatsissimanerisa malitsigisaanik arfininngormat misissorneqarput.
Nunatsinni nakorsaanerup misissuisoqareernerani sapaatip akunnera qaangiummat oqaatigaa, Nuummi annertuumik tuniluuttoqarpasinngitsoq. Inunnulli kaammattuutigaa, aqangu ataasinngornermi inuiattut ullorsiornermi allanut qanillinaveersaarnissaq pillugu malittarisassanik malinninnissaq eqqaamaqqullugu.
Arfininngormat tunillatsissimasumik nutaamik paasisaqartoqarnera eqqarsaatigalugu Henrik L. Hansen ernumassuteqanngilaq, tunillatsissimasormi mattusimasimavoq, aamma inuk tunillatsissimareersutut ilisimaneqartoq pineqarmat:
Ernumanissamut tunngavissaqanngitsoq
- Attavigisimasaanik tunillatsittoqarsimanngilat.
- Natsorsuutigisatsitut tunillatsittoqarsimanngimmat ernumassuteqarnissamut tunngavissaqanngilaq, Nunatta Nakorsaanera Henrik L. Hansen Sermitsiaq.AG-mut oqarpoq.
Inuit tunillatsissimasumut attaveqarsimanerminnit ullut arfineq-aappassaanni misissortissimasut maanna mattusimajunnaareerput, nunatsinni nakorsaaneq oqaluttuarpoq.
Ullut arfineq-aappassaanni misissortinnermi tunillatsissimanngikkaluaraanniluunniit, tunillatsinnissamut suli aarlerinartoqalaarsinnaavoq, nunatsinni nakorsaaneq inunnut mianersoqqusisoq oqarpoq.
Allanut qanillinaveersaarnissaq eqqaamallugu
Tamanna aamma atuuppoq ataasinngornermi inuiattut ullorsiornerup nalliussinerani peqataaniartunut:
- Aqangu allanut qanillinaveersaarnissamut malittarisassat eqqaamaneqassapput, soorunami arlaanni tunillatsittoqarsinnaavoq.
- Taamaammat ataatsimoortorpassuulluni katersuunnissaq mianerisariaqarpoq. Pingaartumik illup iluani, aammali silami katersuuttoqartillugu allanut qanillivallaarnaveersartoqartariaqarpoq, Henrik L. Hansen oqarpoq.