Nunatta Nakorsaanera: Akiuussutissat kingusinaartumik tikiunneqaarsinnaapput
Danmarkimi peqqissutsimut aqutsisoqarfiup coronamut akiuussutissaq AstraZenica sisamanngormat unitsikkallarniarlugu aalajangermagu, tamatuma nunatsinni akiuussutissalersuinissaq tamaat kinguaattoortissinnaavaa.
- Akiuussutissamik AstraZenecameersumik atuinerup unitsinneqarnerata malitsigisaanik naalagaaffeqatigiinni akiuussutissat pigineqartut ikinnerulissapput. Allatut pissarsiniartoqanngippat Nunatsinni akiuussutissalersuineq kinguaattoorsinnaavoq, Nunatsinni Nakorsaaneq Henrik L. Hansen Sermitsiaq.AG-mut oqarpoq.
Peqqissutsimut Aqutisoqarfiup mianersornissaq tunngavigalugu akiuussutissalersuineq unitsikkallarsimavaa, tassa akiuussutissaq taqqatigut milittoortitsisinnaammat. Pasitsaassinerli nakorsaasiorfimmit nutaarsiassaqartitsivimmut Ritzuaimut imatut allalluni isumaqatigineqanngilaq:
- Paasissutissaatitsinnik misissuinerup takutippaa, puatsigut imaluunniit ukioqatigiiaat, suiaassutsit ilaanni nunaniluunniit assigiinngitsuni AstraZenecap covid-19-imut akiuussutissaliaanik atuineq taqqanik milittoortitsinerusoqartanngitsoq.
Taamaammat akiuussutissap AstraZenecameersup Danmarkimi Kalaallillu Nunaanni atorneqaqqilersinnaanera mattunneqanngilaq.
Nunatsinni atorneqarnissaa pilersaarutaasimasoq
- Ilimanarpoq akisuussutissamik AstraZenecameersumik Nunarput neqeroorfigineqassasoq. Akiuussutissat taanna ilagaat qaammatini aggersuni naalagaaffeqatigiinni atorneqarsinnaasoq, nunatsinni nakorsaaneq oqarpoq.
Akiuussutissaq AstraZenicameersoq akiuussutissamut Pfizer/BioNTechimeersup sanilliullugu nillertorujussuami uninngatinneqartussaanngilaq, taamaammat akiuussutissap taassuma Nunatsinni akiuussutissalersuinermi atorneqarnissaa eqqarsaatigineqarsimavoq.
- Nunatsinnit akiuussutissanut atatillugu aalajangersimasunik kissaateqarsimavugut, akiuussutissat assiginngitsut nunami assartuiffigiuminaatsumi atorneqarsinnaasut pissarsiarinissaat pissutigalugu, Henrik L. Hansen nassuiaavoq.
Akiuussutissalersuinissamut piffissaliussaq allanngortinneqartoq
Akiuussutissaq AstraZenicameersoq unitsikkallarneqarmat, Danmarkimi akiuussutissalersuinissamut pilersaarut ingerlaannartumik sunnerneqarpoq. Inunnut 16-ileersimasunut akiuussutissalersuinerup juulip 18-iani naammassineqareersimanissaa siusinnerusukkut naatsorsuutigineqarsimavoq, piffissaliussarli aggustusip 15-ianut kinguartinneqarpoq.
Nunatsinni Nakorsaanerup siusinnerusukkut oqaatiginikuuaa, akiussutissalersuineq juuni 21-ani inuiattut ullorsiornissap nalaani naammassineqarsimassasoq neriuutigalugu, tamannali maanna qularnarsilluinnarsimavoq.