Nunatta nakorsaanera: Akiuussutissanik Danmark aqqutigalugu qulakkeerinninnissaq aalajangiisuussaaq
Covid-19-imut akiuussutissaasinnaasunik Danmark aqqutigalugu qulakkeerunneqarsimaneq Kalaallit Nunaannut pitsaasuuvoq. Akiuussutissamilli sunniuteqarluartumik pilersitsisoqarnissaanut piffissaq sivisooq suli ingerlasinnaavoq, tamannalu Kalaallit Nunaata isumalluutiginiarsinnaanngilaa, nunatta nakorsaanera oqarpoq.
Danmarkimi peqqissutsimut ministeri sapaatip-akunnerani kingullermi oqarpoq, Kalaallit Nunaat coronavirusimut akiuussutissaasinnaasussaq pillugu isumaqatigiissummut ilaatinneqartoq.
Isumaqatigiissut EU aqqutigalugu nakorsaasiorfimmut AstraZenecamut pilersinneqarsimavoq Danmarkimullu akiuussutissanik immikkoortunik 2,4 millioninik qulakkeerinnissalluni, akiuussutissaq ullut ilaanni akuersissutigineqariarpaq.
Nunatta nakorsaanerata Henrik L. Hansenip Kalaallit Nunaata Danmark aqqutigalugu akiuussutissanik qulakkeerunneqarsimanera isumalluarfigaa, taamaanngippat pissarsiarinissaat ajornarsinnaassagaluarmat:
- Tamanna aalajangiisuulluinnarpoq, taamaanngippat Kalaallit Nunaat nakorsaasiorfissuarnut niuerfittut soqutiginaateqanngilluinnassagaluarmat, Henrik L. Hansen Sermitsiaq.AG-mut oqarpoq.
Taanna nassuiaavoq, akiuussutissamut sunniuteqarluartumut nunarsuarmi nunat tamarmik pisusussamaataasut, tamatumanilu Kalaallit Nunaat innuttakitsuararsuunini tunngavigalugu sunniuteqarnissamut ajornakusoortitsissasoq.
Timimi akiuussutissamik pilersitsisinnaasut, illersuutaasinnaanngitsumilli
Tamatuma saniatigut akiuussutissat pillugit Danmarkimik suleqateqarneq misilittarneqarluarsimasuuvoq, nunatta nakorsaanera nassuiaavoq:
- Meeqqanut akiuussutissanik akiuussutissanillu allanik Statens Seruminstitutimit pissarsisartooreerpugut. Naalagaaffeqatigiinnerup iluani ukiorpassuarni suleqatigiinnermik pilersitsisoqarsimavoq. Suliaq manna allaanerunngilaq. Naatsorsuutigaarput Kalaallit Nunaat akiuussutissaalersinnaasussamik naammaginartumik annertussusilimmik pissarseqataassasoq, Henrik L. Hansen nassuiaavoq.
Tamanna oqaatigineqareermat nunatta nakorsaanera naliliivoq, innuttaasut naammagittartariaqassasut, akiuussutissaq coronavirusimik akiuiniarnermi piffissami qaninnerusumi annertunerusumik sunniuteqassagunanngimmat:
- Akiuussutissamik sunniuteqarluartumik qaqugu pilersitsisoqarnissaa eqqoriarneqaannartarpoq. Akiuussutissat maanna misilerarneqartut immaqa timimi akiuussutissamik pilersitsisinnaapput, nappaammulli illersuutaanngitsoorsinnaallutik.
Virusi suli sivisuumik aarlerinartorsiortitsisinnaasoq
- Akiuussutissamik akuersissutiginninniarneq 2021-p ingerlangaatsiarnera tikillugu pisinnaavoq. Covid-19-imut akiuussutissamik pilersitsiniarnerup ajornakusoortorujussuunera paasinarsisinnaavoq.
Henrik L. Hansen naapertorlugu Kalaallit Nunaat tuniluunnermik annerusumik pisoqartinnagu tamatumalu peqatigisaanik angalanerit amerlanerpaat Danmarkimut Danmarkimiillu pisarneranni tuniluunnerup killeqarnerani akiuussutissamik nukinginnartumik pisariaqartitsinngilaq.
Kisianni akiuussutissaq kingusinnerusukkut pingaaruteqalersinnaavoq, virusi suli siaruakkiartortutut isikkoqarmat aarlerinartorsiortitsimmallu:
- Nunarsuarmioqataalersimavugut, inuillu killeqarfiit akimorlugit angallapput, nunarsuarlu tamaat isigalugu akiuiniarneq ingerlalluanngilaq, sumiiffinni tamaniunngitsut iliuusissat pisariaqartut iliuuseqarmata, nunarsuarmilu nunarpassuarni piitsuuni tamanna suliarissallugu ajornakusoortorujussuummat, Henrik L. Hansen oqarpoq.