Nunatta nakorsaanera: Abekoppit coronamiit tuniluunnginnerupput
Abekoppinik tunillatsittoqarsimaneranik pasitsaassinermi peqqinnissaqarfimmi sulisut iliuusissaanut ilitsersuutit nunatta nakorsaaneqarfiata qitiusumik peqqinnissaqarfinnut tamanut ippassaq nassiuppai. Uippallernissamulli peqqutissaqanngilaq, nakorsaaneq oqarpoq.
Qitiusumik peqqissaaviusut tamakkerlugit abekoppinik tunillatsittoqarsimaneranik pasitsaassinermi iliuusissaanik ilitsersuutinik nakorsaaneqarfimmit ippassaq nassinneqarput. Nunatta nakorsaanera Henrik L. Hansen taama ilisimatitsivoq.
- Ilitsersuut danskit peqqinnissaqarfianni aamma atuuttuuvoq. Ilitsersuutit qitiusumik peqqinnissaqarfinnut tamanut nassiuppagut, nappaatip suussusaata nunatsinni eqqumaffigineqarluarnissaa pillugu, Henrik L. Hansen Sermitsiaq.AG-mut nassuiaavoq.
Uippallernissamulli peqqutissaqanngitsoq, aamma erseqqissarpaa:
- Uippallernissamut peqqutissaqartoqanngilaq. Soorunami ilisimanngilarput nappaatip siaruaannissaa qanoq ikkumaarnersoq, tuniluunnerli maannakkorpiaq killeqarluinnarpoq. Abekoppit coronamit tuniluutinnginnerupput, nappaalanersuaqalernissaanullu ilimanaat annikitsuararsuuvoq, oqarpoq.
Ineriartorneq malinnaavigaa
Abekoppinik tunillatsissimasoq siulleq Danmarkimi ippassaq paasineqarpoq. Nappaammut ersiutit tassaapput kissarneqarneq, qiialluni uulinneq, amermilu naajorarnerit imertallit ikinngorsinnaasartut. Nappaat nalinginnaasumik sakkukitsumik atorneqartarpoq, sapaatit akunnerillu marluk sisamallu akornanni sivisussuseqakkajulluni.
Abekoppip nappaat nutaajunngilaq. Europamili tuniluunnera nutaajuneruvoq, Henrik L. Hansen ilisimatitsivoq.
- Angalasut, pingaartumik Spaniami aamma Canariap qeqertaanni piffissami qaninnermi angalasimasut nappaammut ersiutinik maluginiaasariaqarput, tunillatsissimasinnaanermillu pasitsaassaqarunik peqqinnissaqarfimmut saaffiginneqquneqarlutik. Nappaammilli tunillatseratarnissaq nunarsuarmi sumiluunniit pisinnaasutut naatsorsuutigineqartariaqarpoq, nunatta nakorsaanera oqarpoq.
Danmarkimi nunarsuullu sinnerani tunillaassuunnerup nunatsinni peqqinnissamut oqartussat qanimut malinnaaffigigaat ilisimatitsissutigaa.