Nunatta Nakorsaanera: Aappassaanik kapitinnissat eqqaamallugu
Sisimiuni innuttaasut 65-ileereersimasut siullermeerlutillu kapitereersimasut pingasunngornermi 24. marts 2021 akiuussutissamik kapiteqqinnissamut naggataasumik periarfissinneqarput. Namminersorlutik Oqartussat sulissutigaat akiuussutissat allaanerit innuttaasunut inuusunnerusunut atorneqalernissaat.
Covid-19-imut akiuussutissat Danmarkip pissarsiarisai aallaavigalugit nunarput innuttaasut amerlassusaat aallaavigalugit annertusikkanik aamma nassinneqartartussaavoq.
Nunatta nakorsaaneqarfiata naatsorsuutigaa nunarput akiuussutissanik Johnson & Johnsonimeersunik imaluunniit AstraZenecaneersunik neqeroorfigineqarumaartoq, taakkulu innuttaasut inuusunnerusortaanut atorneqarumaartut. Qaammatit tulliini akiuussutissat pissarsiarineqartussat amerlanerungaatsiarnissaat naatsorsuutigineqarpoq, taakkulu illoqarfinnut arlalinnut nassiussuunneqassapput.
Coronamut akiuussutissamik kapiteqqinnissaq. Pingasunngorpat 24. marts 21 aappassaanik katitittussanik kapuineq...
Slået op af Peqqinnissaqarfik Qeqqa / Regionssygehuset Sisimiut i Onsdag den 17. marts 2021
Sisimiuni peqqinnissaqarfik Facebookimini ilisimatitsivoq Sisimiuni innuttaasut akiuussutissamik siullermeerlutik kapitereersimasut aappassaanik kapitinnissamut periarfissaat kingulleq tassaasoq pingasunngorneq 24. marts. Pfizerineersuniimmi akiuussutissanik Sisimiunut nassiussineq kingulliungallartussanngortoq naatsorsuutigineqarmat.
Inuusunnerit allamik kapitissapput
Akiuussutissaq nunatsinni maanna atorneqartoq PfizerBioNTechimeersoq innuttaasunut ukioqqortunerusunut neqeroorutigineqartartoq minus 80 grademi issimatinneqartussaavoq Nuummilu kisimi uninngasuutigineqarsinnaalluni. Sisimiuni kapitinngitsoortoqassagaluarpat imaaliallaannaq kapuutinik amerlanngikkaluanik nassiussisoqariaannaanngilaq.
Nunatta nakorsaanera taamaattumik kaammattuivoq:
- Akiuussutissamik siullermik kapitereersimaguit, kapiteqqinnissat ullut 42-t qaangiutsinnagit pissaaaq. Siunissami qaninnerusumi sumiiffinni pineqartuni neqerooqqinnaviannginnatta, maanna pisariaqarpat, oqarpoq.
PfizerBioNTechimeersumik akiuussutissamik siullermeertumik kapitereersimagaanni akiuussutissamik allaanermik kapitiinnartoqarsinnaanngilaq.
Akiuussutissat allat piniarneqarput
Akiuussutissaq Modernameersoq pillugu Kalaallit Nunaat danskit oqartussaasuiunut oqaloqateqarpoq. Akiuussutissat Tunumi Avannaanilu innuttaasunut kapuinissamut atorneqarnissaannut pilersaarutigineqarput.
Akiuussutissalli Johnson & Johnsonimeersut imaluunniit AstraZenecameersut innuttaasunut suli kapitissimanngitsunut neqeroorutigineqarsinnaassapput.
Henrik L. Hansenip erseqqissaatigaa akiuussutissaq AstraZenecameersoq Danmarkimi atorneqannginnerani nunatsinni neqeroorutigineqarunnanngitsoq.
- Innuttaasut suli akiuussutissalertissimanngitsut maanna atorneqartumit allaanerusumik neqeroorfigineqarumaarnerat naatsorsuutigisinnaavarput, akiuussutissallu neqeroorutigilerumaagassagut maannakkumit amerlanerujussuunissaat aamma naatsorsuutigisinnaallugu. Akiuussutissat assigiinngiiaartut inummut ataatsimut atorneqannginnissaat innersuussutigineqarpoq, oqarpoq.
Pfizer utoqqarnut
Taanna nassuiaavoq akiuussutissat PfizerBioNTechimeersut nunatsinnut nassiunneqartussat tullii Maniitsumut, Qeqertarsuarmut, Qasigiannguanut aamma Narsamut nassiunneqarnissaat naatsorsuutigineqartariaqartoq, innuttaasut ukioqqortunerit taakkunani suli neqeroorfigineqarsimanngimmata.
Avannaani Tunumilu akiuussutissanik naammattunik pissarsinissamut suli sulisoqartoq erseqqissaatigaa.