Nunatta Kinamut tunisartagai rekordiliiffiulersut
Royal Greenlandip aamma Polar Seafoodip Kinamut raajanik tunisartagai amerliartupiloortut ukioq manna rekordiliiffiusussatut naatsorsuutigineqarput.
Kinamiut raajanik immanit nillertuneersunik avataanit tikisitsisarnerat 2022-mi aatsaat taama amerleriaateqartigaaq. Atlantikup avannaani nunanut allanut tunisassiortut tunisartakkamik amerleriapiloornerat aningaasarsiorluarnertillu iluarusuutigaat. Aalisariutaatillit taakkununnga ilaallutik Royal Greenland aamma Polar Seafood, Kinamut tunisartakkaminni 2022-mi nutaamik rekordiliinissartik naatsorsuutigaat, ukiut kingulliit marluk nunarsuarmi nunat annersaanut tassunga tunisat appasinneroreersullu taama pisoqarluni.
Aviisi Sermitsiaq taama allappoq.
- Royal Greenlandimut 2022 Kinamut raajanik qalipaajarneqanngitsunik tunisiffiulluarpoq. Akit 2019-imisut qaffasitsigipput, taamanilu raajanik tunisaqarfiulluarluni, tunisassiorfiup tuniniaanermut qullersaa Bruno Olesen Sermitsiamut oqarpoq.
Qanoq tunisaqartiginermut takussutissani, Kinamut tunisat Royal Greenlandip raajanik tunisaasa tamarmiusut affaannik amerlassuseqarput. Tunisassiorfiup Kinamut raajanik qaleralinnillu 2019-imi tunisaanni kaaviiaartitat rekordiliiffiullutik 1 milliardit koruunit anguaat aamma 2022 nutaamik rekordiliiffiusussatut isikkoqarpoq. Aamma Polar Seafoodip ukioq manna rekordiliinissani naatsorsuutigaa.
- Kinamut ukioq manna aamma tunisaqarluarpugut. Tamanna naammagisimaarparput, Polar Seafoodip siulittaasua Henrik Leth oqarpoq.
Nunarput raajanik immami nillertuneersunik tuniniaanermi nunarsuarmi nunani tunisaqarnerpaasarpoq, Canadalu tullersortitut inissisimalluni. Avammut tunisisartut Kinamiut pisiaqarusunneruleraluttuinnarnerat immikkut ittumik aningaasarsiutigilluarpaat, tassa ukiut siuliinut marlunnut sanilliullugu.
Atlantikup avannaaneersut avammut tuniniaasartut 2022-mi Kinami raajat qalipaajarneqanngitsut akii qaffakkiartupiloortut tunisaqarfigilluarpaat. Kina nunarsuarmi qalerualinnit aalisakkanillu tunisassianik nunarsuarmi tuniniaaffiunersaavoq.
Aviisimi Sermitsiami atuarnerusinnaavutit. Aviisi uani pissarsiariuk:
