aningaasaqarneq
Nunatta karsiani amigartooruteqartarnera ernumassutigineqartoq
Kalaallit Nunaata aningaasaqarnerani sinneqartoornissamut Naalakkersuisut suliniutaat allannguuteqarsimanera Grønlandsbankimit maluginiarneqarpoq
Taama oqariartuuteqartoqarpoq, Naalakkersuisut 2016-mi aningaasaqarnermut missingersuutaanni, maajimi isumaqatigiissutigineqartumi, 11 million koruuninik sinneqartoornissamut anguniagaqaraluarmata. 2017-mi aamma sinneqartoortoqarnissaa naatsorsuutigineqaraluarmat.
Sinneqartoorneq maannakkut mumisinneqarpoq, tassa 65,1 million koruuninik amigartoortoqarmat. Naalakkersuisuniillu naatsorsuutigineqarpoq 2017-mi 62,9 million koruuninik amigartoortoqarnissaa.
Naalakkersuisunit anguniarneqalerpoq aatsaat 2018-mi 2019-milu sinneqartoortoqassasoq. Siullermik 26,2 million koruuninik, aappaanilu 102,7 million koruuninik.
Pisariaqartoq
- Aaqqissuusseqqinnerit ajornanngitsuinnaannnginnerat paasinarpoq. Kisianni ukioq kingulleq amigartoortoqareersoq, aamma ukioq manna amigartooruteqartoqarnissaanik oqariartortoqarnera ernumanarpoq. Tamanna ukiuni tulliuttuni malugineqassaaq. Taamaasilluni aaqqissuusseqqinnissat ajornaallissanngillat, kisiannili aamma aappaatigut pisariaqartinneqassallutik, Naalakkersuisut aningaasanut missingersuutaat pillugit Grønlandsbankenip pisortaanera Martin Kviesgaard oqaaseqaateqarpoq.
Aningaasanut missingersuut sukumiisumik bankimit misissorneqarsimanngitsoq oqaatigineqarpoq.
Nersuineq
Aningaasaqarnermut siunnersuut bankimi pisortaanermit taamaattoq nersualaarneqarpoq.
- Kalaallit Nunaanni unammillernartoqarnera Naalakkersuisunit isortornani oqariartuuteqartoqarnera nersugassaavoq. Ukiuni kingullernisut aningaasaqarnerup qaqisinneqarnissaanut ajornanngitsunik aaqqiiniartoqanngilaq. Naalakkersuisut aaqqissuusseqqinnissaat malinnaaffigissallugu pissanganarpoq, Martin Kviesgaard oqarpoq.