Nunatta Karsia pisariaqartinneqartumik ikiorserneqartoq
Namminersorlutik Oqartussat ingerlatseqatigiiffiutai sisamat 2020-mi corona ilungersunartorsiortitsigaluartoq iluanaarutiminnit, 2021-mut Aningaasanut Inatsimmi missingiunneqarsimasunit 170,4 mio. koruuniusunit amerlanerusunik tunniussaqarsimapput.
Siulersuisut allattoqarfianni pisortap Lars Balslevip februaarip qaammataani pissanngatigisimavaa, Namminersorlutik Oqartussat ingerlatseqatigiiffiutaat iluanaarutiminnit katillugit 170,4 mio. koruuninik tunniussaqarsinnaassanersut
Aamma atuaruk: Aningaasanut inatsit allannguisinnaasumik akisoorsuarmik imaqartoq
Pingaartumik ingerlatseqatigiiffik ataaseq, Royal Greenland, iluanaarutiminit tunniussaqarsinnaanersoq pissanngatigineqarsimavoq, tassa aalisakkerinermik suliffissuaqarfik coronap atuunnerani raajanut aalisakkanullu akigititat appariartornerat tunngavigalugu ingerlatseqatigiiffiup akiliisinnaassusaata ajorseriarsinnaannera pissutigalugu 2020-mi iluanaarutiminit 60 mio. koruuninik akiliisinneqanngitsoorsimammat, taamanikkullu 60 mio. koruunit Nunatta Karsianut nakkartinneqarnissaannut sanilliullugu ingerlatseqatigiiffiup aningaasaqarneranut iluaqutaasinnaanerusimallutik.
Royal Greenland 60 mio. koruuninik tunniussaqassasoq
Royal Greenland 2020-p ingerlanerani nunarsuarmi aalisakkerinermik suliaqarfiit allat assigalugit ilungersunartorsiorsimavoq. Namminersorlutilli Oqartussat ingerlatseqartigiiffiutaasa pingaaaruteqarnerpaartaat ajornartorsiornermit aniguisinnaasimasoq takuneqarsinnaavoq.
Sermitsiaq.AG-mimmi paasineqarpoq, Royal Greenland iluanaarutiminit ukioq manna 60 mio. koruuninik tunniussinissaminut piareeqqasoq.
Taamaalillutik Namminersorlutik Oqartussat ingerlatseqatigiiffiutaat sisamaasut, Royal Greenland, KNI, Royal Arctic Line aaamma Tele-Post, aningaasanut inatsisip missingersuutaanik malinnissinnaasimapput, Tele-Postilu pilersaarutaasutut 87,6 mio. koruuninik tunniussassami qaavatigut 25 mio. koruuninik tunniussisinnaalluni, tamanna Tele-Postimi pisortaanerup Kristian Reinert Davidsenip maajip sisamaani Sermitsiaq.AG-mut ilisimatitsissutigaa.
Aamma atuaruk: Tele-Post iluanaarutimi qaavatigut immikkut 25 mio. kr.-nik tunniusseqqinniartoq
Naalakkersuisut nutaat Nunatsinni politikkikkut nutaamik siunnerfeqarnissaq eqqarsaatigalugu Nunatta Karsianik misissuisoqarnissaanik oqariartuuteqarsimasut iluanaarutinit immikkut ittumik tunineqarnissartik nuannaarutigissavaat.
Millionit qujarunneqassasut
Aningaasat Namminersorlutik Oqartussat ingerlatseqatigiiffiutaannit tunniunneqarniartut qujarunneqassaqaat, tassa coronamut atatillugu ikiorsiissutigineqarsimasut Nunatta Karsianut millioninik pingasunik kisitsisitalinnik naleqarsimagamik. Akiligassat tamarmiusut suli naatsorsorneqarsimanngillat, 2020-mili ilassutitut aningaasaliissutaasimasut IS-mi 50 mio. koruunit missaannik sinneqartoornissamik missingiisimaneq illuanut saatsillugu 455 mio. koruuninik amigaartooruteqarnermik nassataqarsimapput.
2021-mi iluanaarutinit tunniunneqaartut:
Royal Arctic Line: 2,8 mio. kr.
Tele Greenland: 87,6 + 25 mio. kr.
Royal Greenland: 60 mio. kr.
KNI: 20 mio. kr.
Katillugit: 195,4 mio. kr.