Nunatta Karsia amigartooruteqangaatsiartoq – naatsorsuutigisamilli annikinnerusunik

Nunatta Karsia 2021-mi IS-imik taaneqartartumi 150 millioner koruuninik amigartooruteqarsimavoq.

Naalakkersuisut Siulittaasuata marlunngornermi Inatsisartunut tamanna ilisimatitsissutigaa:

- 2021 ukiup siulia assigalugu coronamut akiuiniarluni suliniutinik ingerlatsiffiuvoq. Tamanna nappaatip nunarsuarmi tamarmi siaruaannera akiorniarlugu pinaveersaartitsinermut immikkut ittumik aningaasartuuteqarfiuvoq, pilersaarutillu suliniutillu amerlasuut kinguartinneqarlutilluunniit taamaatiinnarneqarput. Tamanna aamma Nunatta Karsiata Naatsorsuutaanut soorunami sunniuteqarpoq, Múte B. Egede (IA) oqaluttarfimmiit oqarpoq.

Amigartooruteqarsimanerli pillugu nalunaarut aamma pitsaasumik ilaqarpoq, amigartoorutissatummi missingerneqarsimasunit amigartoorutigineqarsimasut 75 millioner koruuninik pitsaanerupput.

Tabelimi siulianiittumi takuneqarsinnaasutur isertitat ikileriarsimapput:

- Isertitat tamarmiusut 2020-mut sanilliullugit 262 millioner koruuninik ikileriarsimapput, tamatumunngalu EU-mik suleqatigiinnissamik isumaqatigiissummiit isertitakinnerusimaneq kiisalu akileraarutinit akitsuutiniillu isertitakinnerusimaneq pingaartumik pissutaapput, naatsorsuutini allassimavoq.

- Namminersorlutik Oqartussat 2021-mi isertitaasa 58 pct.-iisa missaanniittut imaluunniit 4.168 millioner koruunit naalagaaffimmit ataatsimoortumik tapiissutit, EU-mit isertitat aamma isumaqatigiissutigalugit isertitat allat aqqutigalugit pisortani oqartussaasut nuussinerannit pisuupput, ilanngullugu allassimavoq.

49 millioner koruuninik isertitaqarnerusimaneq

Pitsaanerusumik angusaqarsimanermut ilaatigut pissutaavoq, Nunatta Karsiata naatsorsuutigisamit 49 millioner koruunninik amerlanerusunik isertitaqarsimanera:

- Allannguut pingaarnertut nuna tamakkerlugu akileraarutip, nuna tamakkerlugu immikkut akileraarutip, ingerlatseqatigiiffiit akileraarutaata, kiisalu toqqaannanngitsumik akileraarutit ilimagisamit qaffasinnerunerannik patsiseqarpoq, siulittaasoq nassuiaavoq, nangillunilu oqaatigalugu:

- Akerlianik inatsisit tunngavigalugit aningaasaliissutit tapiissutinullu aningaasaliissutit aningaasanut inatsimmut kingornalu ilassutitut aningasaliissutinut sanilliullugu atuinikiffiunerupput.

Naatsorsuutit siullermeerlugit suliarineqarmata oqallittoqanngilaq, partiilli illuatungiliuttut periarfissaq atorlugu aningaasaqarneq pillugu politikkikkut oqaaseqarput.

- Danmarkip akiliuteqartuartarnissaa naatsorsuutigineqarsinnaanngitsoq

Nivi Olsenip (D) ilaatigut oqaatigaa, namminersulivinnissamut aningaasaqarnerup pitsaanerulertingaatsiarneqarnissaa pisariaqartinneqartoq. Naatsorsorsimavaa fem milliarder koruunit missaannik sinneqartooruteqartoqarnissaa pisariaqartinneqassasoq. Tassa ataatsimoortumik tapiissutit kiisalu suliassaqarfiit danskit naalagaaffiannit suli ingerlanneqartut nalingannik sinneqartooruteqartoqartariaqarnerarpaa:

- Namminersulivikkutta Danmarkip akiliuteqartuartarnissaa naatsorsuutigisinnaanngilarput. Ullumikkut atugarissaartuunerput attatiinnarniarlugu ukiumut fem milliarder koruunit missaannik pitsaanerulersitsinissaq pisariaqartipparput.

- Sinneqartooruteqarujussuartarnissap sulissutigalugu aallartinneqarnissaa pisariaqarpoq. Amigartooruteqaranilu sinneqartooruteqanngittarneq naammanngilaq, politikkeri oqarpoq.

Timmisartoqarfiliornerit inatsimmullu tunngaviusussamut isumalioqatigiissitaq

Naleqqameersup Jens Napãtôk-p periarfissaq atorlugu eqqaasissitsissutigaa, partiimit nutaanik timmisartoqarfiliorneq qularnartoqartinneqartoq.

- Aningaasarpassuit atorneqartut uteqqinnissaat qularutiginagu oqaatigisinnaavarput, Napãtôk oqarpoq.

Atassummi siulittaasup Aqqalu Jerimiassenip Inatsimmut tunngaviusussamut Isumalioqatigiissitamut aningaasanik atuineq isornartorsiorpaa. isumalioqatigiissitami siulittaasoq Kuupik V. Kleist qaammatit pingasut sinnilaaginnarlugit siulittaasooreerluni tunuarmat, Inatsimmut tunngaviusussamut isumalioqatigiissitaq upernaaq ajornartorsiuteqalersimammat.

Aningaasaqarnermut Naalakkersuisoq Naaja H. Nathanielsen (IA) oqaaseqartoqareersoq oqaluttarfimmit oqaaseqarpoq:

- Maluginiarpara partiit tamarmiullutik aningaasat eqqortumik atorneqarnissaannik oqariartuuteqartut. Aamma aningaasat eqqortunut atorneqarnissaat eqqarsaatigalugit politikkikkut anguniagaqartoqarnerunissaanik oqariartortoqarnera maluginiarpara, Nathanielsen nunatta karsiata naatsorsuutai Inatsisartut Kukkunersiuinermut Ataatsimiititaliaanut suliareqqitassanngorlugit nassiunneqanngitsiarneranni oqarpoq.