Oqaluttuarisaaneq
Nunatta itsaq oqaluttuassartaanik titartakkanik nangeqattaartuliani atuagaq kingulleq 2017-imi saqqummissaaq
Nuka K. Godtfredsenip titartakkanik atuakkiaasa sisamaanni, Kalaallit Nunaata itsaq oqaluttuassartaanik nangeqattaartuliami kingulliugallartumi, qallunaatsiaat Kalaallit Nunaanniinnerat sammineqarpoq
Kalaallit Nunaata itsaq oqaluttuassartaanik titartaganngorlugu nangeqattaartuliarujussuarmi atuakkat sisamassaat naatsorsuutigineqarpoq 2017-imi decembarimi saqqummerumaartoq. Aviisimi Gladsaxebladet annertunerusumik apersorneqarluni titartaasartoq Nuka K. Godtfredsen taamatut paasissutissiivoq.
Nangeqattaartuliami atuakkat kingullersarigallassavaat.
Ukiuni qulini
Taanna saqqummersinneqarpat suliniut ukiuni qulini ingerlanneqarsimassaaq. Suliniut tamanna tapiiffigineqarpoq Danmarks Nationamuseum-imit nunatsinnilu ilinniutinik naqiterisitsisarfimmit Ilinniusiorfimmit.
Atuakkat kingulliit marluk oqaasertalersornerannut Nuka K. Godtfresenip nulii Lisbeth Valgreen ikiortigisimavaa.
Alloriarneq siulleq
Atuagaq siulleq 2009-mi saqqummersinneqarpoq ateqarlunilu ´Alloriarneq siulleq´. Tassani oqaluttuarineqarput inuit ikittunnguit kangimut Kalaallit Nunaannut ingerlaarnerat, Kristusip inunngornera ukiunik 2.000-nik sioqqullugu.
Atuakkap aappaa ´Ukialiatsiaq´ 2012-imi saqqummersinneqarpoq, tdaannalu Nordisk Rådip meeqqanut inuusuttunullu atuakkianik nersornaasiuttagaanik nersornaasigassatut inassutigineqarpoq. 2015-imilu juulli sioqqutilaarlugu ´Tunissut´ saqqummersinneqarpoq.
Nunasisut aappassaat
– ´Ukiliatsiak´-mi sammineqarpoq nunasinerup aappassaa, 1100-ukkunni pisimasoq, ´Tunissut´-llu 1700-ukkunni pisimasuuvoq. Atuakkat siulliit marluk oqaluttualianik oqaluttuatoqqanillu akulerullugit imaqartoq Nuka K. Godtfredsenip Gladsaxebladetimut oqaluttuaraa.
– Soorunami titartakkat avatangiisinut pinngortitamullu eqqortumik titartagassaapput, inuilli titartarnissaannut kiffaanngissuseqarnerusimavunga, tamarmilli inuit inuusut assilillugit titartagaapput. ´Tunissut´-mi piareersarnermut piffissarujussuaq atorsimavara, pissutigalugu immikkoortualuit amerlaneroqimmata oqaluttuarisaanerlu qanilliartoratsigu. Suullu tamarmik piviusorpalaarluinnartumik titartarneqassapput. Itsarnisarsiuunit immikkullu ilisimasalinnit allanit ikiorlunarneqartorujussuusimavunga, titartaasartoq oqarpoq.