Skip to main content

Nunatta Isiginnaartitsisarfiata tunuliaqutai takukkit

Nunatta Isiginnaartitsisarfiata tunuliaqutai akeqanngitsumik takuniakkit, misigalugulu isiginnaartitsisartut isiginnaagassiamik qanoq sungiusartarnersut. Nunatta Isiginnaartitsisarfia soqutiginnittunut tamanut ammassaaq arfininngornermi februaarip 7-aanni

Nunatta Isiginnaartitsisarfiata tamanut takutikkusuppaa isiginnaartitsisarfiup silarsuaani ulluinnaat qanoq ingerlasarnersut. Taamaattumik piumasut akeqanngitsumik isiginnaariarsinnaavaat ilinniartunik takutitsineq ammasumillu sungiusarneq, Nunatta Isiginnaartitsisarfia tusagassiorfinnut nalunaarutikkut allappoq.

– Isiginnaartitsisarfik maannakkorpiaq ulapiffiuvoq, tamannalu isiginnaartartutta aamma takusariaqarpaat, isiginnaartitsisarfiup pisortaa Svenn Syrin oqarpoq, nangillunilu

– Ualermut allaanerulaartumut qaaqqusivugut. Takuniaasut naatsorsuutigissanngilaat isiginnaagassiamik ineriikkamik takussallutik, akerlianilli suleriaasitsinnik takutinneqassapput, isiginnaartitsisarfiup pisortaa nassuiaavoq.

Isiginnaagassiap ilamernga takutinneqassaaq

Isiginnaartitsisartup Kristian Mølgaardip dramaturg-illu Sussanne Andreassenip isiginnaartitsisartunngorniat sisamat peqatigalugit isiginnaartitseriaaseq aalajangersimasoq, Stanislavskijip periusaanik taaneqartartoq, pimoorullugu sammisimavaat. Ilaatigut suliap tamassuma inernera arfininngornermi  februaarip 7-aanni soqutiginnittunut takutinneqassaaq.

– Sungiusaataalluarpoq suliap ilaanik scenemi isiginnaartunut takutitsinermik naggasiissalluni. Taamaasilluni ilinniartut isumassarsiatik piviusumik misilissinnaavaat, misilittagalikkatillu suliaminnik ingerlatseqqinnerminni atorsinnaavaat, rektori Makka Kleist oqarpoq.

– Aatsaammi isiginnaartunik naapitsinermi isiginnaartitsinivik pilersarpoq, taamaattumillu ilinniartut ilaanneeriarluni scenemiitittarusuppavut, aamma isiginnaagassiaq inerneqanngitsoq takutissagaluarluguluunniit, Makka Kleist oqaluttuarpoq.

´Jiisusi - uanga ernera´ takuteqqaarneqalaassaaq

Inersuarmi isiginnaagassiap ´Jiisusi - uanga ernera´ , aatsaat marsip aallartinnerani takuteqqaarneqartussap, piareersarneqarnera takutinneqassaaq. Nalinginnaasumik sungiusarnerit isiginnaartunut matoqqasaraluarput, ilitsersuisulli Jerker Fahlströmip, Klaus Geisler, Jiisusip ataataatut inuttaasoq peqatigalugu, ulloq taanna matut isiginnaartunut ammarusuppai.

Tassa tamanna pissaaq arfininngorneq 7. februar nal. 14:30 Nunatta Isiginnaartitsisarfiani Industrivej 27-mi, Nunatta Isiginnaartitsisarfia tusagassiorfinnut nalunaarutikkut allappoq.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER