Nunatta Isiginnaartitsisarfia

Nunatta Isiginnaartitsisarfiani pisortanngortussaq

Norskip isiginnaartitsisarfiup pisortaata Svenn B. Syrinip, ukiuni tallimani Nunatta Isiginnaartitsisarfianik ineriartortitseqataareerluni tunuartup, taartissaa nassaarineqarpoq

Susanne Andreassenip Svenn B. Syrin Nunatta Isiginnaartitsisarfiani pisortatut kingoraassavaa

Nunatta Isiginnaartitsisarfiata siulersuisuisa Susanne Andreasen isiginnaartitsisarfimmi pisortassatut nutaatut atorfinitsippaat, ukiuni sisamani tullerni atorfeqartussanngorlugu. Taanna 2016-imi januaarip aallaqqaataani atorfimminut ikkutissaaq.

Susanne Andreasen 37-nik ukioqartoq, isiginnaagassialiornermi dramaturgimik Bachelor of Arts Århusip universititiani ilinniarsimasuuvoq.

2008-miillu Nuummi najugaqarsimavoq kulturikkut aaqqissuussanik assigiinngitsunik isiginnaartitsinertalinnillu suliaqartarsimavoq, ilaatigut Nunatta Kulturikkut illorsuani Katuami, namminerisaminillu 2012-mili suliffiutimini Eventværket & Dramadronningen-imi.

Ilisimasaqarfigilluarpaa

Kiisalu Susanne Andreasen-ip Nunatta Isiginnaartitsisarfia suliffeqarfittut ilisimasaqarfigilluarpaa, isiginnaartitsisartunngorniat ilinniarfianni ilinniartitsisarnermigut, uppernaaq mannalu meerartaartoqarluni taassuma sulinngiffeqarneranut atatillugu taartaalluni isiginnaagassiornermut pisortatut sulinermigut.

Maanna pisortaasup Svenn B. Syrin-ip kissaatigisimavaa atorfeqarnerminut isumaqatigiissutip naanerani tunuarniarluni.

Nunatta Isiginnaartitsisarfiata siulersuisuini siulittaasup Juaaka Lyberth-ip aamma siulittaasup tulliata Arnajaraq Støvlbæk-ip, Nunatta Isiginnaartitsisarfiata aallarnisarneqarnerani Svenn B Syrinp ukiuni tallimani sulilluarsimaneranut qutsavigaat, pisortartaassarlu Susanne Andreasen tikilluaqqullugu.

– Nunatta Isiginnaartitsisarfia nutaamik alloriartussanngorpoq ilinniagaqarsimaneq tunngavigalugu isiginnaagassiortarnertigut, minnerunngitsumillu nammineq kajumissuseq tunaartaralugu isiginnaagassiortarnertigut. Susanne Andreasen pisortaralugu nunatsinni isiginnaartitsisartoqarnikkut qaffariaallatsiteqqinnissarput qilanaaraarput, siulersuisut oqarput.

Siulersuisuni sulittaasoq nutaaq

Nunatta Isiginnaartitsisarfiata siulersuisussai nutaat, kultureqarnermut Naalakkersuisup Nivi Olsenip toqqaqqammerpai. Augustip aallaqqaataani atuutilersussamik maanna siulittaasup tullia Arnajaraq Støvlbæk, Juaaka Lyberth taarserlugu siulittaasuulissaaq.

Arnajaraq Støvlbæk Sisimiuni kulturip illorsuani Taseralimmi pisortaavoq.

Siulersuisunut ilaasortaalersussat allat tassaapput Juaanna Petrussen, KA-mit (Kalaallit Atuakkiortut) toqqagaq, Kristian Mølgaard, Sila (isiginnaartitsisarnermik suliallit kattuffiat), Anda Poulsen, NAIP (nammineq kajumissutsimik isiginnaartitsisartut), kiisalu sulisut sinnisaattut Orla Dalager.

Powered by Labrador CMS