Nunatta isiginnaartitsisarfia 2014-imili aatsaat taama annertutigisumik isiginnaagassiamik Katuami sapaatip akunnerata naanerani takutitsisussanngorpoq.

- Tusaavarput una oqaaserinngisatsinnik oqaasilik assani isaallugit assagut utaqqiinnarai”, Piitsukkut atugaat Palasi, maanna rockoperatut taallugu nutarsarneqarsimasoq taama aallartippoq.

Nipilersorluni isiginnaagassialiami nutaaliaasumi kalaallit oqaluttuarisaanerata ineriartornerujussua takutitsissutigineqassasoq, Katuaq nittartakkamini allappoq.

- Rockoperatut taavarput, scenemiittussallu inuit 21-iussapput. Nipilersortartut, erinartortartut, isiginnaartitsisartut, klassiskimillu nipilersortartut peqatigiillutik, qulliit, videoliat aalasuliallu atorlugit, takutitsinermik ingerlataqassapput, Nunatta Isiginnaartitsisarfiani pisortaq Susanne Andreasen oqarpoq.

Taanna ilisimatitsivoq takutitsinerup nalaani tupaallannartoqarumaartoq, taamaattumillu maluginiutit tamaavimmik misigisaqartinneqarumaartut.

- Suna tamaavimmi nutaaliaavoq, suna tamaat ataatsimoortillugu isiginnaariartussanut saqqummiunnissaa pissanngatigaarput, oqarpoq.

Palasi pillugu oqaluttuaq imaannaanngitsoq

Isiginnaagassiami peqataasut ilaat ilisimatitsivoq Katuami takutinneqartussaq ilaatigut oqimaattortaqartoq.

- Kulturitta pissusittalu (kalaallit-qallunaat) assigiinngissinnaanerat isiginnaagassiami illaatigaagut. Qanga pisimasut oqaluttuaraagut, ullumikkullu aamma suli sunnertisimanarsinnaavoq, erinarsortartoq isiginnaartitsisartorlu Maali Hermansen oqaluttuarpoq nangillunilu:

- Tamanna isiginnaariat sillimaffigisariaqarpaat. Oqaluttuarisaaneq inooqatigaarput, oqaluuserinissaalu ersigisariaqanngilarput.

Hans Egedep tikinneranit ukiut 300-t qaangiuttullu

Hans Egedep Nuummut tikinneranit ukiut 300-nngorneranut atatillugu isiginnaagassiaq suliarineqarpoq, suliniummullu isumassarsisuuvoq Piitsukkunni nipilersortartoq Hans Peter Kleemann.

- Pissaaneqarnermik atuinermut ilaatigut tunngavoq, pissaaneqartullu illaatigisinnaanissaat maanna piffissanngorunarpoq. Pissutsit persuarsiorpalaartumik sammisarneri naammalerpoq, isiginnaartitsisartoq erinarsortartorlu Miké Thomsen, isiginnaagassiami peqataasussaq oqarpoq.

- Nunasiaataalersimaneq pillugu aliasunneq kamassaqarnerlu annertoorujussuupput. Tamanna illuatungilerniarlugu quujasaarisinnaasariaqarpugut, oqarpoq.

Isiginnaagassiaq Katuami 11. aamma 12. marts katillugit pingasoriarluni takutinneqassaaq.