Skip to main content

Nunatta isiginnaartitsisarfia toqqorsivimmik pilersitserusuttoq

Isiginnaartitsinerup silarsuaanni inuit pingaarutillit Tuukkaq aamma Silamiuneersut ulluni makkunani Nunatta Isiginnaartitsisarfia peqatigalugu Nuummi oqaluttuanik atortussanillu katersiniarlutik paasiniaaqqatigiileruttorput.

- Tuukkaq aamma Silamioqanngitsuugutta ullumikkut angusagut uunga killissimassanngikkaluarput, Nunatta Isiginnaartitsisarfiani pisortaq, Susanne Andreasen oqarpoq.  

Tuukkaq aamma Silamiut ullumikkut Nunatta Isiginnaartitsisarfeqarnitsinni aqqutsissiuisuusut, pisortaq isumaqarpoq. Taamaammat Tuukkap Silamiullu nalaani isiginnaartitsisartut ilitsersuisullu oqaluttuanik, manuskriptinik allanillu assigiinngitsunik katersiniarlutik katersuutinneqarput. Nunatsinni isiginnaartitsinerup oqaluttuarisaanerata tammatsaaliorneqarnissaa neriuutigalugu. 

- Atortorineqartarsimasunik oqaluttuanillu katersinissaq siunertarineqarpoq. Tassami isiginnaartitsinerup kalaallit kinaassusaat nutaanerusoq saqqummersittarsimavaat piorsarsimassuserlu eqqarsaatigalugu kingornussat erlinnartut takutinneqartarsimallutik, Susanne Andreasen oqarpoq nangillunilu:

- Toqqorsivimmik pilersitsiniarnermi inuit oqaluttuarisaanermi peqataasimasut isiginnaartitsinerullu silarsuaani allannguisimasut peqataatsinneqarnissaat pingaarnerpaatut isigisimavarput. Taamaammat toqqorsivissamik pilersitsiniarnermi taakkua aallarniuteqarfigaagut. Ataatsimoorluta oqaloqatigiisaagut uagut paasiniaaqqatigiinermi. 

Tuukkaq aamma Silamiut ilaatigut ukiortaami aliikkusersortarnikuuaatigut erinarsuutillu maanna nuna tamakkerlugu ilisarisimaneqartut sulilu atorneqartartut taakkunannga suliarineqartarsimapput. Kalaallit kinaassusaat nutaanerusoq saqqummiuttarsimavaat paqumigineqartullu aamma saqqummiunnartarlugit. 

Agga Dam Pedersen, Makka Kleist, Else Danielsen aamma Varste Mathæussen ilaatigut paasiniaaqqatigiinermi peqataapput. Taakkua isiginnaartitsisartuullutillu ilitsersuisuupput, isiginnaagassianik, tv-kkut isiginnaagassiat atorlugit 80-ikkut 90-ikkunnilu aliikkusersuisarsimapput.

Isiginnaagassiat, manuskriptit erinarsuutillu katersorneqassapput

Isiginnaagassiat annertuut annikitsullu, manuskriptit, oqaluttuat erinarsuutillu maanna ataatsimoortinneqarlutik katersaatigineqanngillat. Paasiniaaqqatigiinerullu toqqorsiveqalernissamut aqqutissiuisuusaaq.

- Kissaaterput annerpaaq tassaavoq kinguaariinut tulliuttunut takuneqarsinnaalernissaat, maannami suliarineqarsimasut tamaangaannartinneqassanngillaq. Siunissaq ungasinnerusoq eqqarsaatigalugu toqqorsivimmik pilersitsisoqarnissaa kissaatigaarput maannalu aaqqissugarput tassunga killinnissatsinnut pingaaruteqarluinnarpoq, pisortaq oqarpoq. 

Ataatsimiinermi saqqummiisoqartarpoq oqaloqatigiittoqartarlunilu - taakkua tamaasa Tormod Carlsenimiit aaqqissorneqarput. 

Saqqummersitsineq

Silamiut nalaani isiginnaartitsinerniit assit plakatillu Nunatta Isiginnaartitsisarfiani saqqummersinneqassaaput. Nuummi innuttaasut Nuuk Nordisk Kulturuge-qarnerani takusarsinnaajunaaraat, isiginnaartitsisarfik paasissutissiivoq. 

Paasiniaaqqatigiinnermi peqataasit ilaat tassaapput: Svenn Syrin, Makka Kleist, Else Danielsen, Vivi Nielsen, Agga Dam Pedersen, Indra Lorentzen, Varste Mathæussen, Elisabeth Heilmann Blind, Anders Berndtsson allallu. 

Taakkua saniatigut Ilisimatusarfimmiit allallu isiginnaartitsinermi soqutigisalli paasiniaaqqatigiinnermi peqataatsinneqarput. Paasiniaaqqatigiineq ammavoq soqutiginnittullu Nunatta isiginnaartitsisarfianut saaffiginnissinnaallutik.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER