Ironmanimi VM

Nunatta ironmania: VM-imi una anguniassavara

Ironmanimik nunarsuarmi pissartanngorniunnissami, Hawaiimi ingerlanneqartussami, siullerpaamik kalaallimik peqataasoqassaaq

Jens Bjerge sapaatiuppat Hawaiimut aallassaaq Ironmanimi VM-eqarnerani peqataajartorluni

50-inik ukiulik Jens Bjerge sapaatiuppat Hawaiimut aallassaaq Ironmanimi nunarsuarmi pissartanngorniunnermut peqataajartorluni.

Aatsaavissuaq siullermeersumik Ironmanimi VM-eqarnerani kalaallimik peqataasoqassaaq.

Arfininngorpat tulliani unamminissaq sakkortoorujussuussaaq, tassa 3800 meterimut nalulluni, 180 kilometerimut sikkilerluni kiisalu maratoni arpallugu.

Tamakkiisumik sungiusarsimanngilaq

– Siusinnerusutulli oqareernittut tamaviaarujussuarnavianngilanga. Aammami VM-ip tungaanut tamakkiisumik sungiusarsimannginnama suliffinni ulapinnera pissutigalugu, Jens Bjergre Ssermitsiaq.AG-mut oqarpoq. Taanna ulluinnarni Nukissiorfiit erngup nukinganik nukissiorfianni Utoqqarmiut Kangerluarsunnguaniittumi, Nuummit 50 kilometerinik kujasissusilimmiittumi, sulisuuvoq.

Taassuma ironman aggustimi Københavnimi ingerlappaa, tassanilu rekordini qaangerlugu atorsimavai akunnerit 9, minutsit 54-it sekundillu 23-t.

Tamatigut apuuttarpoq

– Unamminerli ingerlatissavara qanorluunniit pisoqaraluarpat. Nalunngilara sakkortunerujussuussasoq, tassa kiannerussammat aammalu Hawaiimi sikkilerneq tamaviaarnassaqimmat. Unammineq ingerlanniarniarpara akunnerit 11-t ataallugit, Jens Bjerge oqarpoq.

Taassuma sapaatiuppat ernini Hawaiimut aallaqatigissavaa.

– Kalaallit Nunaannit tapersersorneqarnera nuannaarutigeqaara, tulluusimaarutigeqaaralu pisumi taama angitigisumi peqataassagama, nunatta ironmania oqarpoq.

Powered by Labrador CMS