Skip to main content

Nunatta internetikkut illersornissani nammineq aqukkusuppaa

Internetikkut isumannaallisaanermut tunngatillugu Namminersorlutik Oqartussat llersornissaqarfiup Isertortumik Paasiniaasartuisa ataaniilerusunngillat. Illuanik taakku qanimut suleqatigalugit nammineq inatsiseqarnissaq ilungersuunneqarniarpoq.

llersornissaqarfiup Isertortumik Paasiniaasartui 2014-imili Danmarkip internetikkut navianartorsiorneq annertusiartuinnartillugu illersorneqarnera pingaarnertut akisussaaffigaa. Tassani sulineq Internetikkut Isumannaallisaanermik Sullissivimmi ingerlanneqartarpoq, taanna inatsimmit 2014-imeersumit arlalinnik pisinnaatitaaffeqalerpoq. Taannali inatsit Kalaallit Nunaanni aamma Savalimmiuni atuutinngilaq.

- Internetikkut Isumannaallisaanermik Sullissivik pillugu inatsit Kalaallit Nunaannut aamma Savalimmiunut atuutinngilaq, kisianni kunngikkormiut peqqussuteqarnerisigut tamakkiisumik imaluunniit ilaannaa Kalaallit Nunaanni aamma Savalimmiuni atuutilertinneqarsinnaavoq, savalimmiormiut kalaallillu atugaannut tulluarsarlugit, illersornissamut ministeri Claus Hjort Frederiksen (V) allagaqarluni Sermitsiaq.AG-mut taama akissuteqarpoq.

Kisianni inatsit Kalaallit Nunaanni tamakkiisumik ilaannakumilluunniit atuutilernavianngilaq, Tony Ditlevsdal, Digitalimik Sullissinermut Aqutsisoqarfimmi pisortaagallartoq ilisimatitsivoq.

- Inatsit Kalaallit Nunaanni atulernavianngilaq, taanna Sermitsiaq.AG-mut naqissusiivoq.

Danskit inatsisaannut taarsiullugu suleqatigiinneq

Taarsiullugu internetimut aamma paasissutissiinermi isumannaallisaanermut nammineq inatsiseqarnissaq sulissutigineqassaaq. Pilersaarut malillugu ingerlasoqassappat aamma siunnersuut Naalakkersuisunit akuerineqassappat, inatsisissatut siunnersuut ukiaanerani ataatsimiittoqalerpat saqqummiunneqassaaq.

- Danmarkimit killilersorneqarnissarput kissaatiginngilarput, kisianni pitsaasumik qanimut suleqatigiinnissaq kissaatigaarput, Tony Ditlevsdal oqarpoq.

Naak nammineq inatsiseqarnissaq anguniarneqaraluartoq, Internetikkut Isumannaallisaanermik Sullissivimmi ilisimasallit ikiortigineqarnissaat periarfissaassaaq.

- Internetimut aamma paasissutissiinermut isumannaallisaanermi inatsit Kalaallit Nunaanni aamma Savalimmiuni atuutinngikkaluartoq, Internetikkut Isumannaallisaanermik Sullissiviup kajumissutsimigut aamma isumaqatigiissuteqarnikkut Savalimmiunut aamma Kalaallit Nunaannut tamanna pillugu siunnersuisinnaapput, Claus Hjort Frederiksen (V) oqarpoq.

Kalerrisaarisarfiit

Suleqatigiinnerup aaqqissuunnerissaanut pilersaaruteqartoqarpoq.

- Sulisui, ilisimasaat aamma teknologiiat atussallugit kajumippugut. Internetikkut navianartorsiorneq annertusiartuinnartoq kisitta akiorsinnaanngilarput, Tony Ditlevsdal oqarpoq.

Internetikkut Isumannaallisaanermik Sullissivik pisortani oqartussani aamma suliffeqarfinnut inuiaqatigiinnut pingaaruteqartunut kalerrisaarisarfinnik ikkussuisinnaavoq, taamaalillutik toqqaannartumik sullissiviup internetikkut isumannaallisaanermut sullissivianut attaveqalissapput. Tony Ditlevsdalip oqarnera naapertorlugu, Tele-Post aaqqiissummut taama ittumut soqutiginnippoq.

Internetikkut isumannaallisaanermut kalaallit inatsisissaata taamatut atassuteqarneq iluarsisinnaassavaa.

Internetikkut Isumannaallisaanermik Sullissivik oqartussani suliassaqartoq

Namminersorlutik Oqartussat inatsiseqalileraluarlutik Internetikkut Isumannaallisaanermik Sullissivik atorluarsinnaassavaat, kisianni aamma killeqarpoq.

- Internetikkut Isumannaallisaanermik Sullissivik kajumissutsimik siunnersuinerup saniatigut Kalaallit Nunaanni aamma Savalimmiuni oqartussani suliaqarsinnaaneranik inatsit periarfissaqartitsinngilaq, inatsisip tamanna Danmarkimi periarfissaatippaa, Claus Hjort Frederiksen (V) oqarpoq.

Illersornissamut ministerip oqartussani suliassat unnersuussutai tassaapput, Danmarkimi Internetikkut Isumannaallisaanermik Sullissiviup paasissutissiinermi isumannaallisaanermut oqartussatut akisussaasuunera, kiisalu oqarasuaateqarnermi upalungaarsimanermut.

Kalaallit Nunaanni inatsisissaq naapertorlugu Digitalimik Sullissinermut Aqutsisoqarfik pingaarnertut internetikkut isumannaallisaanermut akisussaasuussaaq. Internetikkut paasissutissiinermilu isumannaallisaanermik suliaqartunik pilersitsisoqassaaq, taakku suliarinnittuussallutik.

Danmarkimi naalakkersuinermik suliaqartut Internetikkut Isumannaallisaanermik Sullissivik pillugu inatsisip allanngornissaa oqallisigaat. Inatsisissatut siunnersuut suliffeqarfinnik aamma innuttaasunik nakkutilliineranut tunngatillugu pisinnaatitaaffeqarpallaartoq, arlalinnit isornartorsiorneqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER