naalagaaffeqatigiinneq

Nunatta erfalasuata Danmarkimi amuneqartalernissaa Kielsenip ilalerpaa

Kalaallit inuiattut ullorsiorneranni Danmarkip erfalasutsinnik amusisalerniarnera inussiarnersaarneruvoq nuannersoq, Naalakkersuisut siulittaasuat isumaqarpoq

Kim Kielsen, Vestnordsik Råd
Kim Kielsen, Siumut, Savalimmiuni oqalugiartoq. Assi toqqorsivimmit

Kalaallit Nunaata Savalimmiullu inuiattut ullorsiorneranni nunat taakkua erfalasuinik amusisalernissamik qallunaat qanittukkut nalunaarutaat Naalakkersuisut siulittaasuata Kim Kielsenip (S) ilalernartippaa, tamanna politikerinit kalaallinit savalimmiormiunillu iluarineqarpiarsimanngikkaluartoq.

Tallimanngormat nalunaarutigineqarpoq Erfalasorput siunissami juunip ulluisa 21-ianni (inuiattut nalliuttorsiornermi) Danmarkimi naalagaaffiup illutaani tamani amuneqartalissasoq, taamatuttaarlu savalimmiormiut inuiattut ullorsiorneranni inussiarnisaarfigalugit erfalasuat amuneqartassasoq.

Qallunaat akuerinnipput

– Tamanna isigaara erfalasutsinnik Kalaallillu Nunaata naalagaaffeqatigiinni immikkut ittumik inissisimaneranik akuerinninnertut, Naalakkersuisut siulittaasuat KNR-mut oqarpoq.

– Aamma qallunaat naalakkersuisuisa nunatta erfalasuata Danmarkimi amuneqartalernissaanik iliuusaat uanga Naalakkersuisullu pitsaasutut isigaarput.

Savalimmiormiut akerliupput

Kielsen maannakkorpiaq pisortatigoortumik Savalimmiunut tikeraarpoq.

Ataasinngormat Sermitsiaq.AG-mut oqaluttuarpoq savalimiuni folketingimut ilaasortap Magni Arge-p, partiimit Tjódveldi-meersup, ministeriunerup naalagaaffeqatigiit iluanni taamatut inussiarnisaarniarnera ilalernartippallaanngikkaa.

Powered by Labrador CMS