Skip to main content

Nunatta erfalasuanik oqaluttuaq eqqaamaneqarpoq

Nunatta erfalasuanik sanasoq Thue Christiansen pingasunngorpat 75-iliissaaq. Erfalasutta siullermeersumik amuneqarnerata kingorna ukiut 30-t qaangiuttut suli eqqumiitsuliornermik ingerlatsivoq

Kalaallit Nunaat ukiumi ataatsimi namminersorneroreersoq oqallisingaatsiareernerup kingorna eqqumiitsuliortup Thue Christiansenip nunatta erfalasussaatut siunnersuutaa toqqarneqarpoq. Taanna siullermeersumik pisortatigoortumik amuneqarpoq, 1985-imi Kalaallit Nunaata inuiattut ullorsiornerani. Pingasunngorpat Erfalasutsinnik sanasoq 75-iliissaaq.

Thue Christiansen Uummannap eqqaani Maarmorilimmi inunngorsimavoq, Maniitsulimili peroriartorluni. Nuummi realskolimit soraarummeereerluni Danmarkiliarpoq, tappavani Haderslev Statsseminarium-imi ilinniagaqarluni.

Ukiualunnguit Danmarkimi ilinniartitsisutut sulerereluni Thue Christiansen Kalaallit Nunaannut uterpoq ilinniartitsisutullu sulilluni, tamannalu peqatigalugu partiimut Siumumut ilaasortaalluni nunatsinni politikkimut akuleruppoq.

1979-imi namminersornerulernermut atatilugu Thue Christiansen nunatsinni siullersaalluni kulturimut naalakkersuisunngorpoq. Ukiuni sisamani naalakkersuisooreerluni Kulturimut Pisortaqarfimmi atorfilittut atorfinippoq.

Erfalasutsinnut missingersuut siulleq

Kulturimut naalakkersuisuunermi nalaani Thue Christiansen Nunatta erfalasussaanut missingersuusiorpoq. Taanna siunnersuutinit arlalinnit, ilaatigut erfalasoq qaqortoq qorsummik sanningasulik, toqqarneqarpoq. Erfalasutsinni takutinneqarpoq seqineq sermersuakkut nuisoq.

Kalaallit Nunaata erfalasua, qaqortoq aappalaartorlu qeqqani ammallorissulik aappalaartumik qaqortumillu qalipaatilimmik, nunat avannarliit erfalasuinit sanningasulinnit allaaneruvoq, Dannebrog-illi qalipaatai atuinnarlugit naalagaaffeqatigiinneq takutinniarlugu.

Issuaaneragaasoq

Kingorna Thue Christiansen pasillerneqarpoq Hjortshøj-Egå Idrætsforening-ip katinngataanik, pingasunik teqeqqulimmik, assiliisimasutut. Eqqumiitsuliortoq naapertorlugu naalakkersuisut allattoqarfiata assingunera maluginiarsimavaa, peqatigiiffillu oqaaseqaateqaqqullugu qinnuigisimallugu.

Kulturimut naalakkersuisuunermi, eqqumiitsuliornermut siunnersortitut aamma Kulturimut naalakkersuisoqarfimmi allaffimmi pisortatut sulinermi saniatigut Thue Christiansen ukiuni marlussunni tusagassiortuuvoq, tamatumalu kingorna eqqumiitsuliortutut ilusilersuisartutullu imminut ilinniartissimasutut sulilerluni.

Thue Christiansen Efalasutsinnit ilisimaneqarnersaagunarpoq, aammattaarli ilisimaneqarpoq frimærkinik logo-nillu titartaasartutut, pinnersaanermik suliaminit, qalipakkaminit grafik-iliakkaminillu, kiisalu sanaluttakkamigut.

Thue Christiansen ullumikkut nuliilu Katrin Jyllandip qeqqani Uldumimi najugaqarput.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER