Nunatta Eqqumiitsulianik Saqqummersitsivianut tapiisoqarpoq
Aningaasaateqarfiit Dronning Margrethes og Prins Henriks Fond aamma Kronprins Frederiks og Krinprinsesse Marys Fond Nunatta Eqqumiitsulianik Saqqummersitsivissaanut tapiissuteqarput.
Dronning Margrethes og Prins Henriks Fond aamma Kronprins Frederiks og Krinprinsesse Marys Fond 250.000 koruuninik Nunatta Eqqumiitsulianik Saqqummersitsivissaanut tapiissuteqarput.
- Taama taakkunanit tapiiffigineqarneq siulersuisunit aningaasaliisussarsiornerup aallartinneranut pingaaruteqartutut ilassilluarparput. Taamami kunngikkormiut aningaasaateqarfinnit aningaasalilluarneq siulersuisut, pilersaarutip piviusunngortinnissaanut, ingerlariaqqinnissaminnut qiimmatsaatigaat, tusagassiutinut nalunaarutigineqarpoq.
200 million koruunit missaat
Pilersaarut 200 mio kr qulaallugit akeqassangatinneqartoq aningaasaliisussarsiuunneqalerpoq. Siulersuisut neriuutigaat nunatsinnit, Danmarkimit nunanillu allanit taperserumaneqarluni aningaasaliiffigiumaneqarluassasoq.
- Naatsorsuutigaarput sanaassaq 2022-mi aallartinneqarsinnaassasoq taamalu Nunatta eqqumiitsulianik Saqqummersitsiviata kikkunnut takusaarusuttunut matuni ammarsinnaajumaarai ukioq 2025-ip ukiassalernerani, nalunaarutigineqarpoq.
Nunatta Eqqumiitsulianik Saqqummersitsivissamut Josef Motzfeldt siulersuisuni siulittaasuuvoq.