Nunatta Eqqumiitsulianik Saqqummersitsivia 50 mio.kr.-inik neriorsuiffigineqalersoq: - Isumaqartorujussuuvoq, siulittaasoq oqarpoq
Naalakkersuisut Nunatta Eqqumiitsulianik Saqqummersitsivianut 50 millionit koruuninik tapiissuteqartoqarnissaanut akuersissuteqarfigineqarput. - Kiisami Nunatta pisortatigoortumik aningaasaleeqataanissaanut neriorsuuteqarfigineqarpugut, siulersuisunut siulittaasoq oqarpoq.
Aningaasanut inatsisissamut isumaqatiginninniarnernut atatillugu Nuummi Nunatta Eqqumiitsulianik Saqqummersitsivissuanik sanaartornissamut suliniut aningaasaqarnikkut tapiiffigineqassaaq.
Tassami Naalakkersuisut sanaartornermut 50 mio. kr.-inik tapiissuteqarnissamut neriorsuuteqarsinnaasut, Naalakkersuisut partiillu isumaqatigiissutigaat. Aningaasanut inatsisissap pingajussaaneerneqarnerani, pappiaqqani Inatsisartunut nassiunneqartuni tamanna atuarneqarsinnaavoq.
Siulersuisut aningaasat sinnerinik aningaasaateqarfinnit pissarsiarinnissinnaanissaannik, neriorsuuteqarnermut piumasaqaataasoq pappiaqqani allassimavoq.
Sanaartorneq katillugu 260 mio. kr.-inik akeqassasoq naatsorsorneqarnikuuvoq.
Ukiorpassuarni Nunatta Eqqumiitsulianik Saqqummersitsiviani siulersuisunut siulittaasoq, Josef Tuusi Motzfeldt, tapiissuteqarnissamut neriorsuut suliniummut ukiorpassuarni ingerlanneqartumut maanna ingerlariartitseqqittoq, Sermitsiaq.AG-mut oqarpoq.
Sanaartornermut aamma ikiuunniartut
- Pingaaruteqarluinnarpoq. Kiisami Nunatta pisortatigoortumik ammasumik aningaasaliinermut peqataanissamut kiisalu suliamik tigusinissamut neriorsuuteqarfigaatigut, Josef Tuusi Motzfeldt oqarpoq.
Siulersuisunut siulittaasup oqarnera naapertorlugu Naalakkersuisut sanaartornermut aamma ikiuunniarlutik neriorsuuteqarput:
- Aningaasaliineq inissinneqarpat, maanna aningaasaateqarfiup siulersuisuisa suliassaq Namminersorlutik Oqartussanut tunniutissavaat, taakku sanaartortitsisussatut tigusiniarlutik akuersipput.
Aningaasaateqarfiit allat tapiissuteqannginneranni Naalakkersuisut peqataatinneqarnissaat aalajangiisuusimasoq, Motzfeldt oqarpoq:
Aningaasaliisussarsiornermik suliallit ikiuutissapput
- Nunatta avataani inuit suliassamut soqutiginnittorujussuupput, kisianni Nunarput pisortatigoortumik peqataatinnagu aningaasaliissuteqarnissamut tunuarsimaarsimapput, siulersuisunut siulittaasoq taama oqarpoq.
Sulisut marluk 210 millionit koruunit sinneruttut pissarsiarinissaannut ikiuukkumaartut, Josef Tuusi Motzfeldt oqaluttuarpoq:
- Ukiumit nutaamit aningaasaliissutinik pissarsiniartartut marluk piumassuseqarluartut pissarsiarissavavut, taakku aningaasaateqarfiit assigiinngitsut attaveqarfigeriikkavut attaveqarifissavaat.
Nunatta Eqqumiitsulianik Saqqummersitsivianik pilersaarusiornerit pillugit oqaluttuaq 2004-mili aallartippoq, tassani ataatsimiititaliamik pilersitsisoqarpoq, Nunatsinni Eqqumiitsulianik Saqqummersitsivimmik pilersitsisoqarnissaa siunertarineqarluni. Kingorna Nunatta Eqqumiitsulianik Saqqummersitsivianut aningaasaateqarfimmik pilersitsisoqarneranik kinguneqarpoq, 2011-milu suliniut BIG Bjarke Ingels Groupimeersoq titartaatitsinermik unammisitsisnermi ajugaasutut toqqarneqarpoq.