Nunatta Eqqumiitsulianik Saqqummersitsivia 2025-mi naammassisimasinnaassasoq

Nuummi nunatta eqqumiitsulianik saqqummersitsivianik sanaartorneq 2022-mi aallartissinnaavoq saqqummersitsivillu 2025-mi naammassisimasinnaassasoq, siulersuisut, sanaartornermut aningaasanik tapiissutinik katersuiniarlutik maanna aallartittut, neriuutigaat

Silammut isikkiviup ammalortup ilorlikkut igalaaminiusup iigaa pinngortitamut peqqarniitsumut qiperukkanillu naatsiiviliamut ataqqinartumik isikkivimmik pisariitsumik kusanartumillu sinaakkusiivoq, nunatta eqqumiitsulianik saqqummersitsivissaanut ilisarititsissummi nutaami allassimasoqarpoq.

Nunatta Eqqumiitsulianik Saqqummersitsiviata siulersuisui maanna pimoorullugu sulinialerput 200 millioner koruuninillu saqqummersitsivissallu Nuummi pilersaarutaasup sananeqarnissaanut aningaasaliissutissanik pissarsiulerlutik.

Siulersuisut neriuutigaat, aningaasat naalagaaffimmi nunallu tamalaat akornanni aningaasaateqarfinnit tapiissuteqartunillu pissarsiarineqarsinnaassasut.

Siulersuisut tusagassiuutitigut nalunaarummi allapput, kultureqarnermut naalakkersuisoq, Katti Frederiksen, ataatsimeeqatigineqaqqammersimasoq, tamatumani nunatta saqqummersitsivissaanut pilersaarut saqqummiunneqarsimasoq.

Tapiinissamut akuersinerit uppernarsarneqarsimasut

- Kultureqarnermut naalakkersuisut suliniummut soqutiginninnermik annertuumik ersersitsivoq, Naalakkersuisullu Kommuneqarfik Sermersuutut saqqummersitsiviup ingerlanneqarnissaanut tapiissuteqarniarlutik akuersisimanerat uppernnarsarlugu.

Pilersaarummi saqqummersitsivimmut pilersaarutit periusissiaq, anguniakkat ingerlatsinerlu eqqarsaatigalugit qanimut allaaserineqarput.

Ilaatigut allassimasoqarpoq, Kalaallit Nunaanni najugaqartunut tamanut iserneq akeqassanngitsoq aamma atuisut 12.500-nik amerlassuseqarnissaat kiisalu angalasut digitalimilluunniit neqeroorutinik atuisut 9.000-inik amerlassuseqarnissaat naatsorsuutigineqartoq – atuisut ukiumut katillugit 21.500-t.

Tikeraat nunanit tamalaaneersut 15.000-it

Tamatuma saniatigut siulersuisunit naatsorsuutigineqarpoq, nunanit tamalaanit tikeraat allat ukiumut 15.000-it missaaniittut takkuttassasut. Taakku isernermut 70 koruuninik akiliuteqartinneqartassapput.

Sanaartornissap 200 millioner koruunit missaannik akeqartussap saniatigut siulersuisut naatsorsuutigaat, nunatta saqqummersitsiviata ingerlanneqarnera ukiumut 8 millioner koruunit missaannik akeqassasoq.

Tamatumani siulersuisut naatsorsuutigaat nunanit tamalaanit tikeraanit isertitat 1 million koruunit missaanniittassasut. Aningaasat sinneri Kommuneqarfik Sermersuumit aamma Namminersorlutik Oqartussanit ingerlatsinermut tapiissutinit aningaasalersorneqassapput.

- Sanaartornerup 2022-mi aallartissinnaanissaa Nunattalu Eqqumiitsulianik Saqqummersitsiviata takuniaasunut 2025-mi ukiassariartulernerani ammarsinnaanissaa neriuutigineqarpoq, siulersuisut allapput.

Saqqummersitsiviup inissisimaffissaa arlaleriarluni allanngortinneqartarsimavoq, saqqummersitsivissarli siulersuisut naapertorlugit, maanna Nuummi C.E. Janssens vejip isuani kiisami inissaqalersimavoq.

Powered by Labrador CMS