Nunatta Eqqartuussiviata meeqqat pornoliarineqarsimaneranut pineqaatissiissut sakkortusivaa
Nunatta Eqqartuussiviata angut Sisimiuneersoq meeqqanik pornolianik sakkortuunik imaqartunik pigisaqarsimasutut pineqaatissippaa. Qaammatini arfinileq-marlunnik pineqaatissiissut eqqartuussivimmi aalajangerneqarsimasoq, qaammatinut qulinut sivitsorlugu Nunatta Eqqartuussivia pineqaatissiissummik sakkortunerulersitsivoq.
Angut 33-nik ukiulik Sisimiuneersoq meeqqanik pornoliaralugit assilisanik filmilianillu sakkortuunik imaqartunik tigummiarsimasutut, qaammatini qulini pinerluuteqarsimasut inissiisarfianniittussanngorlugu Nunatta Eqqartuussivianit pineqaatissinneqarpoq.
Taamaasilluni eqqartuussivimmi pineqaatissiissutigineqarsimagaluartoq, tassa qaammatini arfineq-marlunni pinerluuteqarsimasunut inissiisarfimmiitsitsinissaq, Nunatta Eqqartuussiviata sakkortunerulersippaa.
Eqqartuussivimmi suliaq suliarineqarmat angutip pineqaatissiissutini sakkukinnerutikkumallugu suliaq suliassanngorteqqissimavaa. Unnerluussisussaatitaasup ilanngullugu sukanganerusumik pineqaatissiinissaq piumasarisimavaa.
Kalaallit Nunaata Politiivi taama tusagassiorfinnut nalunaaruteqarput.
Angut meeqqanut kinguaassiuutitigut innarliisimasutut, suliani assigiinngitsuni pingasuni, Nunatta Eqqartuussiviani 2015-imi aamma pineqaatissinneqareersimavoq.
Assit 18.000-it sinneqartut
Nunatta Eqqartuussiviata suliaq sapaatip akunnerani kingullermi suliaraa. Angut unnerluutigineqartoq assinik meeqqanik pornolianik imaqartunik 18.000-init amerlanerusunik, aamma filmilianik 5.000-inik amerlanerusunik pigisaqarsimasutut unnerluutigineqarpoq.
- Unnerluutigineqartoq assinik filmilianillu meeqqanik pornolianik imaqartunik 1.000-it tungaanut amerlatigisunik allanut nassiussisarsimasutut aamma pineqaatissinneqarpoq, tusagassiorfinnut nalunaarutigineqarpoq.
- Meeqqanik atornerluisartut akornanni assinik filmilianillu annerusumik minnerusumilluunniit aaqqissugaasumik nassiussuisarnerit ingerlapput. Taamaammat assit filmiliallu amerlangaatsiartut pigineqartarput. Assilli ataasiakkaat tamarmik, aamma filmiliat ataasiakkaat tamarmik pinngortarput meeqqamik kinguaassiuutitigut atornerluinikkut. Tamannalu pisarpoq nunarsuarmi sumiluunniit. Nunatta Eqqartuussiviata sakkortunerusumik pineqaatissiinissamik piumasaqarnera malimmagu iluarisimaarpara, unnerluussisussaatitaasoq Mads Schønning Frandsen oqarpoq.
Suliat amerligaluttuinnartut
Kalaallit Nunaata Politiivisa 2020-mi ukiumut naatsorsuutaani takuneqarsinnaavoq meeqqanik pornolianik suliat ukiuni tallimani kingullerni amerleriarujussuarsimasut.
Suliat ukiumut imaapput:
- 2016: 5
- 2017: 5
- 2018: 13
- 2019: 17
- 2020: 11
- Nunatta Eqqartuussiviata aalajangiinermini assit filmiliallu amerlangaatsiarneri tunngavilersuutigaa, taakkunanilu imarisat sakkortuneri tunngavilersuutigalugu. Angutip siusinnerusukkut meeqqanik kinguaassiuutitigut kannguttaatsuliorsimasutut pineqaatissinneqarsimanera nalilersuinermut aamma ilaatinneqarpoq. Taakku tunngavigalugit pineqaatissiissut qaammatinik pingasunik sivitsorneqartariaqartoq, Nunatta Eqqartuussivia aalajangerpoq, pinerluuteqarsimasut inissiisarfianni qaammatini qulini pineqaatissinneqartussanngorlugu, allassimavoq.