Nunatta Eqqartuussivia: Arnaq ikuallaasimasutut toqutseriarsimasutullu eqqartuunneqarpoq
Nunatta Eqqartuussiviani ataasinngornermi 10. januar 2022 suliassanngorteqqitaq pillugu eqqartuussisoqarpoq. Arnaq ikuallaasimasutut toqutseriarsimasutullu unnerluunneqarluni, ukiuni tallimani pinerluuteqarsimasunut inissiisarfimmiittussanngortinneqarluni pineqaatissinneqarpoq.
Arnaq 25-nik ukiulik ukiuni tallimani pinerluuteqarsimasunut inissiisarfimmiittussanngorlugu Nunatta Eqqartuussiviani eqqartuunneqarpoq. Sermersooq Eqqartuussiviani pineqaatissiissut, ukiunik pingasunik sivisussuseqaraluartoq, taamaasilluni sakkortunerulersinneqarpoq.
Pineqaatissiissut ippassaq ataasinngornermi 10. januar 2022 aalajangerneqarpoq. Arnaq ilaatigut ikuallaasimasutut, persuttaasimasutut, siorasaarisimasutut, Tasiilamilu augustip aallartinnerani 2020-mi toqutseriarsimasutut unnerluutigineqarsimavoq.
- Pisut ilaanni arnaq 25-nik ukiullip arnaqatini alla ilagalugu arnaq alla persuttarsimavaa, suliamilu allami inummut allamut siorasaarisimalluni. Pisumi kingullermi arnaq ikuallaasimasutut toqutseriarsimasutullu unnerluutigineqarpoq, Kalaallit Nunaata Politiivi tusagassiorfinnut nalunaaruteqarlutik nassuiaapput.
Toqutseriarsimanermut tunngasoq suliassanngorteqqinneqartoq
Eqqartuussiviup 23. august 2021 sulisiullermeerlugu suliaraa. Arnaq eqqartuunneqartoq persuttaasimasutut, siorasaarisimasutut ikuallaasimasutullu eqqartuunneqarpoq. Toqutseriarsimasutulli eqqartuunnagu inuk ikiorneqarsinnaajunnaarlugu qimaannarsimasutut eqqartuunneqarluni.
Eqqartuussisussaatitaasup suliaq suliassanngorteqqippaa, suliassanngortitsinermilu toqutseriarsimanerup uppernarsarnissaa kisiat suliassanngortillugu, politiit ilisimatitsipput.
Nunatta Eqqartuussiviata eqqartuussut maanna sivitsorpaa, pineqaatissiissullu ukiunik marlunnik ilallugu.
- Nunatta Eqqartuussiviata unnerluussisussaatitaasup, toqutseriarsimanermut tunngatillugu pineqaatissiissutillu sivisunerunissaanut piumasai malimmagit iluarisimaarpara, unnerluussisoq Line Thornberg oqarpoq.
Eqqartuussut
Nunatta Eqqartuussiviata uppernarsarneqartutut aalajangerpaa arnap ilisimasimassagaa ikuallaaneq inuunermut ulorianartorsiortitsilertussaasoq. Ilanngullugu arnap ilisimasimassagaa angut illumik piginnittuusoq, unnummilu tassani illumi imeqatigisimasani angerlarsimasimassasoq ikuallaanerup nalaani, uppernarsarneqarpoq.
Toqutseriarsimasutut taamaammat eqqartuunneqarpoq. Uppernarsarneqarsinnaasimanngilarli inuk alla illup iluaniittoq arnap ilisimasinnaasimaneraa.