Issittoq
Nunatta Danmarkillu Qalasersuarmik piumasaqarnertik New Yorkimi saqqummiuppaat
New Yorkimi FN ippassaq ullumikkullu pisortatigoortumik nunaviup toqqavittaanut danskit naalagaaffiannit piumasaqaateqarfiuvoq
PAASISSUTISSAT:Qalasersuarmik piumasaqarneq saqqummiunneqartoq
Kalaallit Nunaanniit Danmarkimiillu atorfilittat angalaqatigiit augustip 17-iani 18-ianilu 2016 Kunngeqarfik Danmarkip Kalaallit Nunaata avataani nunaviup toqqavia toqqavinnut ataatsimiititaliarsuarmut piumasaqaataa, oqaaseqaatip ilaa saqqummiuppaat.
Nunaviup toqqavianik piumasaqaatit aamma Naalakkersuisut danskillu naalakkersuisuisa 2014-imi allakkatigut toqqavinnut ataatsimiititaliarsuarmut piumasaqaatiginikuusaat.
Nunap assinga takuuk: Qalasersuaq pillugu oqartussaaffimmik piumasaqaateqalerpugut
Oqaaseqaatsit taakku pingasut Kalaallit Nunaata kujataani, avannaata kangiani avannaanilu 200 sømilimit avasinnerusumi inissisimapput.
Paasissutissarpassuit
Nunanullu allanut naalakkersuisup, Vittus Qujaukitsup (S), Danmarkip Kalaallit Nunaatalu piumasaqaatertik maanna saqqummiummassuk nuannaarutigaa.
- Sumiiffinnut pingasuusunut piffissaq sivisooq uppernarsaatinik katersinermut, suliaqarnermut tunniussinermullu atoreerlugit maanna piumasaqaatigut nunavinnut ataatsimiititaliarsuarmut saqqummiunneqarnerat pitsaasuuvoq, taanna tusagassiuutinut nalunaarummi oqarpoq.
Atuaruk: Ilisimatooq: Danskit kalaallillu Issittumi piumasaqaataat piviusunngorsinnaavoq
- Maanna kinguneqartussamik suliarineqarnissaat Toqqavinnullu Ataatsimiititaliarsuarmik ataatsimeeqateqarnissaq malitsigisaannillu nunat allat piumasaqaatitsinnut qalleraattumik piumasaqartut isumaqatigiinniarnissaat qilanaarluta utaqqissavarput. Nunaviit toqqaviannut suliniutip ersersippaa naalagaaffeqatigiinnerup iluani nunallu issittut sanilerisagut pitsaasumik suleqatigineqarneri.
Ilisimatuussutsikkut aamma inatsisitigut tunngavik
Nunanut allanut ministerip Kristian Jensenip (V) naalagaaffeqatigiinnerup iluani issittumilu sanilerisanik suleqateqarluarneq nuannaarutigaa.
- Kunngeqarfiup killeqarfiata avammut killingata inissinniarnerani piumasaqaatitta uppernarsarnissaat qulakkeernissaallu sivisuumik annertuumillu suleqatigiiffiusup maanna killiffia pingaaruteqarpoq. Taassumalu saniatigut nunarsuarmioqatigiit nunat killeqarfii ilisimatuussuseq inatsisillu tunngaviusut aqqutigalugit suleqatigiinnerata annertuumik tapersersornerata ersersinnissaa pingaartuuvoq. Issittumi kinguneqaataasumik eqqissisimasumik peqataanissaq aalajangiisuulluinnarpoq, Kristian Jensen oqarpoq.
PAASISSUTISSAT:Qalasersuarmik piumasaqarneq saqqummiunneqartoq