Assilisanik saqqummersitsinissami Danmarkip Kalaallit Nunaatalu akornanni pissutsit nunasiaataanerullu nalaa, suli malunniuteqartoq, sammineqassapput.

Assiliisup Minik Bidstrupip assilisaanik saqqummersitsineq pissaaq Københavnimi Kalaallit Illuutaanni qulequtaqarlunilu "Saperasi isumaqaleritsi / Courageously take a stand".

Taama Kalaallit Illuutaat tusagassiuutitigut nalunaarummi paasissutissiivoq, saqqummersitallu Copenhagen Photo Festivalimut aamma peqataanissaat oqaluttuaralugu.

John Møllerip assilisai toqqorsivinniittut atorneqartut

Minik Bidstrup Danmarks Kunstskolemi, Fatamorganami (2017) kiisalu New Yorkimi Center of Photographymi Documentary Practice and Visual Journalismimik (2020) ilinniagaqarsimavoq.

Saqqummersitami Minik Kalaallit Nunaata Dannmarkillu akornanni oqaluttuarisaanermi pissutsinik nunasiaataanerullu nalaanik, ullutsinni Kalaallit Nunaanni suli malunniuteqartumik, sammisaqarpoq.

- John Møllerip assilisaanik toqqorsivinniittunik uangalu nammineq assilisannik diptykoninik katiterivunga taamaalillungalu qanga pissutsit pillugi assilisatigut oqaloqatigiinnermik pilersitsillunga.

Nunasiaataasimaneq sunniutaalu 

- John Møller kalaallini siullersaalluni assiliisutut sulisimavoq nunatsinnilu 1890-ikkut aallartinneranniit 1920-kkut qiteqqunnerannut assiliisarsimalluni. Oqaloqatigiinnerni taakkunani sammisaq nunasiaataasimanermut taassumalu sunniutaanik sivisuumik atuuttunik aallaaveqarpoq, Minik Bidstrup oqaluttuarpoq.

Minik Bidstrup assiliisutut namminersortutut inooqatigiinnermi naapertuilluassuseq, nunasiaataasimanerup kingorna kinaassuseq aamma konservatoriami assiliineq pingaartillugit piviusulersaarutinik assilisat aamma assilisat atorlugit tusagassiuinermik suliaqarpoq.

Ammaanersiornermi takuniaasunit assiliisoq naapinneqarsinnaassaaq, taannalu aamma naatsumik oqalugiassalluni. Saqqummersitaq juulip 28-ata tunganut takuniarneqarsinnaassaaq.