Camp Century
Nunatta Danmark USA-lu Naalagaafiit Peqatigiinnut suliassanngortinniarlugit siorasaarutigigaa
Sermersuup ataani sakkutooqarfiusimasoq Kalaallit Nunaata Danmarkip USA-llu aaqqiagiinngissuteqarfigaat
Amerikarmiut sermip ataani sakkutooqarfigisimasaa USA-p Nunatta Danmarkillu aaqqiaginngiiffigaat. Politiken taama allaaserisaqarpoq.
Sakkutooqarfik Camp Centuremik atilik USA-p Sovjetunionenimut illersorniarluni pilersinnikuaa.
Ukiulli 50-t matuma siorna sakkutooqarfik matummat mingutsitsinerujussuaq qimaannarneqarpoq. Ilaatigut diesel 200.000 literi, igitassat radioaktiviusut, kemikaliat igitassallu ulorianaatillit qimaannarneqarsimallutik.
Ilisimatuulli amerikkarmeersut silaannaap kissatsikkiartornerani sermeq aakkiartortoq augustimi uppernarsarpaat. Sakkutooqarfiusimasorlu sermip ataaniittoq tamassuma kinguneranit qulaariartulersimasoq.
Sermip aakkiartornerani mingutsitsineq qulaariartormat Nunatta Danmarki piumaffigaa saaliisoqarnissaa USA-mut piumasarineqassasoq.
Piumasaqaammut misissuisoqassasoq nunanut allanut ministerip Kristian Jensenip (V) akissutigaa. Tamannali naammanngitsoq Naalakkersuisut isumaqarput.
Nunanut allanut tunngasunut naalakkersuisup Vittus Qujaukitsup nunanut allanut ministerimut Kristian Jensenimut oktobarip ulluisa 24-anni allagarisimasaa nutaarsiassaqartitsiviup Politikenip pissarsiarisimavaa.
- Kissaatigisatta danskit tungaannit malinneqarnissaannut piumassuteqartoqanngippat, Kalaallit Nunaata matumani pineqartoq nunani tamalaani suleqatigiiffinnut attuumassuteqartunut saaffiginnissutigisariaqassavaa, allakkami atuarneqarsinnaasut ilagaat.
Naalagaaffiit Peqatigiit isumaqatigiissutaat marluk nunallu inoqqaavisa pisinnaatitaaffii pillugit nalunaarutit Vittus Qujaukitsup allakkamini innersuussutigai.
Kristian Jensen Vittus Qujaukitsorlu marlunngorpat Nuummi pineqartoq pillugu naapissapput.
Kalaallit Nunaat naalagaaffiunnginnami nunat kornganni eqqartuussivik Haagimiittumut suliassanngortitsisinnaanngilaq. FN-mulli suliassanngortitsinnaanermut tamanna akimmisaarfiunngilaq.
Rasmus Gjedssø Bertelsen Politikenimut taama inerniliivoq. Taanna naalagaafiit pissusiinut Tromsøp Universitetiani ilinniartitsisuuvoq issittumilu politikki naalagaaffinngorsaanerlu ilinniagaqarfigalugit.
/ritzau/