Nunatta Atuagaateqarfiata nalequttat tamponillu akeqarunngitsumik atorsinnaatilerai
Nalequttat tamponnillu Nuummi nunatta atuagaateqarfiani anartarfinni marts qaammat tigoriaannanngortinneqarput. Aaqartarnerup naliginnaasuuneranik takutitsiniarnertut suliniut ingerlanneqarpoq.
Arnat qaammatit tamaasa 100-200 koruunit akornanni pisiassanut aalajangersimasunut akiliisarsinnaapput. Tassa aaqarneq nalinginnaasuugaluartoq, aaqalernerit tamaasa nalequttanut aamma tamponinut aningaasartuutit. .
Nuummi nunatta atuagaateqarfiata arnat ulluat 8. marts malunnartinniarlugu, anartarfimminni nalequttat tamponillu tamanit tigoriaannanngorlugit marts qaammat tamaat saqqumisissavaat.
- Aaqartarnermi piitsuussuseq nunarsuaq tamakkerlugu ajornartorsiutaavoq. Aaqartarnermut atortunut akissaqannginneq inuiaqatigiinnut peqqinnissamullu kingunerlutsitsisarpoq aamma Kalaallit Nunaanni, Nunatta Atuagaateqarfia Facebookimini allappoq.
Nunatta atuagaateqarfiani sammisassaqartitsinernik ingerlatsisuni aqutsisoq Pam Stach Sermitsiaq.AG-mut nassuiaavoq arnat aaqartarnerat nalinginnaasuusoq paquminarunnaarsinniarlugu atuagaateqarfik arnat ulluat malunnartinniaatigalugu suliniuteqartoq.
Sammisaq politikkimi oqallisigineqarluartartoq
Arnat aaqartarneq namminneerlutik unitsissinnaanngimmassuk, pinngitsooratillu aaqarnermi atortut atortariaqartarmatikkit, sammisaq nunat tamalaat akornanni politikkikkut oqallisaangaatsiartarpoq.
Skotland nunarsuarmi siullersaalluni aaqarnermi atortut 15. august 2022-mi akeqarunnaartippai.
- Inuppassuit aaqartarput, tamassuma paquminartuunani nalinginnaasuunissaanut suliniuteqartuni siuttoorusuppugut. Suliniutigisarput allaniit malinneqarumaartoq neriuutigaarput, qaammatimmi tamaasa aaqartoqartarnera paquminartuujunnaartariaqarpoq, Pam Stach oqarpoq.
Nordens Institut i Grønland, NAPA, nunatta atuagaateqarfiata Facebookiani allapput namminneerlutik isumassarsiaq malillugu aaqartarnermi atortut aamma akeqanngitsumik tigoriaannanngortissimallugit.
Suliniut pitsaasutut isigineqartoq
Naligiissitaanermut Naalakkersuisoq, Naaja Nathanielsen (IA) isumaqarpoq aaqarnermi atortut akeqanngitsunngortinnissaanut oqallinneq soqutiginarluinnartuusoq, Naalakkersuisoqatinilu tusarniassallugit ilisimatitsilluni. Ilanngulluguli erseqqissarpaa aaqarnermi atortut akeqanngitsunngortinnissaanut Naalakkersuisut maannakkorpiaq pilersaaruteqanngitsut.
- Oqallinnerli soqutiginarluinnartuuvoq, naligiinnginnermut aamma tunngagami. Aningaasartuuteqartussammi kisimiupput niviarsiaqqat arnallu. Ilanngullugu aamma piujuaannartitsinissamut apeqqummut tunngassuteqarpoq. Nunatta atuagaateqarfia suliniummut qujaffigaara, apeqqullu Naalakkersuisuni saqqummiukkumaarlugu, naligiissitaanermut Naalakkersuisoq, Naaja Nathanielsen Sermitsiaq.AG-mut oqaaseqarpoq.
Nunatta atuagaateqarfia ulloq 8. marts aaqartarnermut, utoqqalilernermi aaqassaartarneq, meerartaarsinnaannginneq, meerartaarniannginnermik aalajangiusimaneq arnallu pillugit sammisanik imaqartut atuakkat saqqumitissavai. Arnat inuunerannut tunngasut atuakkat naniuminartunngorlugit quppersakkanik aamma peqassaaq.
Atuakkanik atorniartarfiup anartarfiini tamponit nalequttallu inissaqartuaannalersinnaaneri pillugit, marts qaammat naareerpat nalilersuisoqassaaq:
- Suliniutigisarput qanoq tiguneqarnersoq takorusuttorujussuuarput. Suliniutitut maanna aallartipparput. Atuisuttalu tamanna qanoq tiguneraat takoqqaarlugulu nalilersueqqaassaagut, Pam Stach Sermitsiaq.AG-mut oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...