Nunatta atisanik ilusilersuisartoq tupaallatsikkaa
Nunatta Katersugaasiviani Unnuk Kulturisiorfimmi arfininngornermi januaarip 21-anni saqqummersitsineq nutaaq ammarneqassaaq, tassani atisanik ilusilersuisartup tusaamasap kalaallit atisaat aallaavigalugit nutaanik atisaliorsimavoq
''Sermip Kunngiata Pania Imm. II - kulturikkut kingornussarsianik piujuaannartitsinermik tunngavilik'' saqqummersitaq taama taaguuteqarpoq, tassani haute-couturmik ilusilersuisartoq Jørgen Simonsen kalaallit kalaallisuuinik isumassarsiorsimavoq.
- Sermip Kunngiata Paniami siunertaavoq, atisanik nutaalianik ilusilersuisartoq isumassarsititaagaangat susoqartarneranik paasiniaaneq. Inuiaqatigiit isumassarsivigisai qanoq sunnerneqassappat, isumassarsiallu saqqummiunneqarnertut sussappat?, katersugaasivik tusagassiuutinut nalunaarummi allappoq.
Saqqummersitsineq pilersinneqarpoq qallunaap atisaliortartup Jørgen Simonsenip, Kalaallisuuliornermik Ilinniarfiup Sisimiuniittup, mersortarfiup Kittat Nuummiittup, ammericiup Great Greenlandip, Nunatta Katersugaasiviata aamma NAPA-p suleqatigiinnerisigut.
Saqqummersitsineq tarranik tallimanik Jørgen Simonsenimit pilersitanik nutaartaqarpoq atisartaat Istanbulimi, Nuummi kiisalu Sisimiuni suliaasimapput. Saniatigut titartakkat siulliit Jørgen Simonsenip suliai Sermip Kunngiata Panianut atatillugu titartagaatai 1998-mi Atisaliorfissuarmi Versaces Haute-Couture kollektionimik taasami saqqummersinneqarsimasut ilaapput.
- Ataatsimut isigalugu inuunermut piumasaqartorujussuuvunga - suliannut tunngappata pitsaanerpaaffimminniissasut anguniartarpara, atisaliortartoq Jørgen Simonsen oqaaseqaammini taama oqarpoq.
- Aamma uannut piumaffiginera tassaniippoq atisanik ilusilersuisartutut, nutaanik pilersitsisartutut aamma eqqumiitsuliortutut…Taakku tamakkerlutik Kalaallit Nunaat piorsarsimassuserlu uannut tupatsitsisimaqaaq tarnikkut uppitinneqartuusisimagama. Neriuutigaara ataqqinnittumik takunnittussanut inerniliisimallunga, eqquinikkut, tupinnartuliornikkut aqqutissiuinerullu tungaasigut, nangilluni oqarpoq.
Unnuk Kulturisiorfimmi ammarneqassasoq
Saqqummersitsineq Nunatta Katersugaasiviani takuneqarsinnaavoq januaArip ulluisa 21-aniit marsip ulluisa 2-t ilanngullugu, takusaasullu saqqummersitat allat piujuartut iluatsillugu qimerloorsinnaavaat Jørgenimut isumassarsiorfiulluarsimaqisut.
