Nunatta aningaasaqarnerata pillugu Folketingimi oqaluuserineqassaaq

Kalaallit Nunaat ilungersunartumik inissisimavoq. Kalaallit Nunaata karsia annertuumik amigartooruteqassaaq aamma aningaasaqarnikkut nuna siunissarippallaanngilaq.

Taamatut isumaliuteqarput Dansk Folkepartimit Søren Espersen, Venstremit Claus Hjort Frederiksen, Villum Christensen Liberal Alliancemit aamma Per Stig Møller De Konservativenit. Taamaattumik sisamaallutik statsministeri Helle Thorning-Schmidt, Socialdemokraterne, Folketingip ataatsimiittarfiani ataatsimeeqatigiumavaat februaarip tallimaani. Kalaallit Nunaata aningaasaqarnera tassani eqqartorneqassaaq.

- Kalaallit Nunaata aningaasaqarnikkut inissisimanerata ilungersunartuunera ataatsimiissutigineqassaaq. Danmarki assingusumik aningaasatigut taamatut inissisimasuuguni ukiumut 20-30 milliard koruuninik amigartooruteqartarsimassagaluarpoq. Aningaasaqarnerat ingerlaannaq iluarsineqarsinnaanngilaq, aamma siunissami pitsanngoriarnissaa takorlooruminaappoq, Søren Espersen Sermitsiaq.AG-mut oqarpoq.

- Kalaallit Nunaat akiliisinnaajunnaarluni ingerlalissanngippat, danskit naalakkersuisui iliuuseqartariaqarput, oqarpoq.

Kalaallit Nunaannut tapiissutaasartut amerlineqarnissaannik Søren Espersen siornatigut oqariartuuteqareerpoq. Namminersornermut Inatsip taamaasiortoqarnissaa akuerinngilaa. Taamaattumik Namminersornermut Inatsip nalilersorneqaqqinnissaa pingaaruteqartoq Søren Espersen oqariartuuteqarpoq. Søren Espersen Namminersornermut Ataatsimiititaliami ilaasortaasareerpoq, Namminersornermullu Inatsit akerleralugu taaseqataalluni.

- Namminersornissamut Inatsit allanngortinneqarsinnaavoq taamaasilluni aningaasatigut tapersiisarnerit ukiut tamaasa allanngorartinneqarsinnaalersillugit. Danmarki aamma Kalaallit Nunaat ataatsimoorlutik uuliasiornissamut aningaasaateqarfiliorsinnaapput, tamanna siornatigut Namminersornermut Ataatsimiititaliami aamma eqqartorneqartareerpoq, Espersen oqarpoq.

Aningaasaateqarfik tamanut iluaqutaasoq
Kalaallit Nunaanni uuliasiornermut aningaasaateqarfiup sinneqartoorutaanut tuttartussanut eqqartorneqartareerpoq.

- Kalaallit Nunaanni ukiuni tulliuttuni 20-ni 30-niluunniit amigartoorluni ingerlatsisoqartassaaq. Danmarki aningaasatigut sooruna ikiorsiisinnaanngitsoq, Søren Espersen aperaaq.

Naatsorsueqqissaartarfiup kisitsisit nutaat saqqummiussaani takuneqarsinnaavoq Nunatsinni suliffissaaleqisut ikiliartortut. Taamaakkaluartoq Danmarkimi politikkerit oqarput Kalaallit Nunaanni suliffissaaleqisut tupaallannartumik amerliartuinnartut.

- Kalaallit Nunaanni suliffissaaleqisut inissisimanerat assigiinngiiaarpoq. Nunaqarfiit ilaanni innuttaasut tamarmik suliffissaaleqisuupput, ilaannili innuttaasut akornanni 40-50 procentii suliffissaaleqisuusarlutik, Espersen oqarpoq.

Folketingimi Kalaallit Nunaat pillugu ataatsimiititaliaanni ilaasortaasut taakku sisamat eqqartorneqartussaq juulli tikitsinnagu eqqartorneqarnissaa piumasarisimagaluarpaat. Nunatsinnili Inatsisartunut qinersisoqarnerata pissutigisaanik ataatsimiinnissaq kinguartinneqarluni.