Nunatsinnit panertunik qimminut nerukkaasiortoqalersoq
Aallarnisaasup Ulloriaq Kreutzmannip kingusinnerpaamik savanik panertitanik qimminut nerukkaatissanik tunisassiornissani februaarip naaneranit aallartissinnaassallugu naatsorsuuteqarpoq.
Qimminut qimuttunut nerukkaatissanik panertunik tunisassiornissamut maskiinat atugassat sapaatip-akunnerani matumani Narsamut tikipput. Aallarnisaasyo Ulloriaq Kreutzmannip, suliffeqarfimmik Milak Productionsimik piginnittup, maskiinat maanna piareersarpai. Tunisassiornerullu erngertumik aallartinnissaa naatsorsuutigaa.
- Aallaqqaammut savaaqqap neqai panertillugit qimminut nerukkaatissiarineqassapput. Aammattaaq aalisakkanik tunisassiorfiit sinnikorisinnaasaat ammaffigaakka. Tunisassiorfinnillu oqaloqateqarneq aamma aallartereerpoq, Ulloriaq Kreutzmann Sermitsiaq.AG-mut oqaluttuarpoq.
- Qimmitsinnut qimuttunut nerukkaatissatsinnik nammineq tunisassiulernissatsinnut piffissanngortoq isumaqarpunga. Neqitassaqartereerpavut, taava avataanit eqqussuinermit pisariaqartitsinnginnerussagatta suliaqartariaqarpugut.
Nunatsinni toqqorsivik suliffigalugu
Ulloriaq Kreutzmann Sisimiuninngaanneerpoq, kisianni Narsami nerukkaatissanik tunisassiorniarpoq.
- Tunisassiorneq Narsami aallartissavara, Kujataa nunatsinni nerisassanik toqqorsivissuaraarput. Qimminut nerukkaatissiornissamik atugassakka maani pissarsiariuminarnerupput, Ulloriaq Kreutzmann oqarpoq.
Taanna nammineq Sisimiuni qimmeqarpoq, qimminullu nerukkaatissat nammineq pisanik ilaartunngikkaanni akisusinnaasartut misigisarpaa.
Suliffeqarfik taarsigassarsivoq aamma Nalik Venturesimit tapiiffigineqarluni, taamaalilluni maskiinat piareerpata tunisassiorneq aallartissinnaassavaa.
Suliffeqarfik nammineq tunisassiaminik qimmiutilinnut siunissami tunisassiorniartoq, aallarnisaasoq ilisimatitsivoq. Nammineq tunisassianik nioqquteqarneq qaqugu aallartissanersoq maannakkorpiaq ilisimanngilaa.