Nunatsinnit ikiuniarneq tupigusutsitsisoq
Nunavumi ikuallarujussuartoqarnerata kingorna millionit koruunit affaannik tunissuteqarneq qujamasuutigineqarpoq, kisianni aamma tupigutsaatigineqarpoq. Tassami pisiniarfik ammaqqereermat.
Kalaallit Nunaat Iqalunni pisiniarfissuaq ikuallarujussuareersorlu Nunavummut 500.000 koruuninik tunissuteqarpoq. Pisiniarfissuarmi nioqqutissaatigineqartut ilarparujussui ikuallattoqarnerani aserorneqarput.
Aviisi AG taama allaaserisaqarpoq.
- Nunavummi naggueqatitsinnut assatsinnik isaassisinnaanerput nuannaarutigaara, Aningaasaqarnermut Naalakkersuisoq, Vittus Qujaukitsoq, oqarpoq.
Aningaasaliissutit ikersuup illuatungaani qujamasunnermik pilersitsipput. Aammali eqqumiiginninnermik. Ikiorsiissuteqarnermummi tunngavilersuutitut Naalakkersuisut oqaatigaat pisiniarfissuarmi North Martimi ikuallattoqarnerani »pingaartumik quersuaq niuertarfissuup eqqannguaniittoq ikuallannermit eqqorneqarpoq. Taamaalillunilu illoqarfiup ukiuunerani peqqumaatissaasa ilarpassui annaaneqarput aammalu Iqalunni najugalinnut ulluinnarni nioqqutissanik allanillu pilersuinissaq ajornartorsiutaalerpoq«
Nalunaarut eqqissiallannartoq
- Najukkamili oqartussat pilersuinissamut assingusumik ernummateqanngillat. Ikuallattoqarnerata kinguninnguatigut illoqarfiup borgmesteria Madeleine Redfern innuttaasunut eqqissisaalluni twitterikkut nalunaaruteqarpoq. Tassani ilaatigut paasissutissiivoq illoqarfimmi aqutsisut najukkamilu naalakkersuisunut sinniisut illoqarfimmi pisiniarfinnik piginnittunik ataatsimeeqateqarsimasut.
- Nioqqutissanik niuertortatta tamarmik qularinngilaat, inuiaqatigiit pisariaqartitaannik matussusiinissamut naammattunik nerisassanik pissamaateqarlutik, Twitterimi allappoq.
Ikiuneq pillugu suliaq tamaat AG-mi atuaruk – uani ataani isissutissarsigit: