illersornissaqarfik
Nunatsinniititaqarnissamut sungiusarsimanermik atortunillu amigaateqartoq
Kalaallit Nunaanni siunissami sakkutuut sungiusarneri amerlanerit pisalersinnaapput sakkutuullu timmisartuannik aalajangersimasumik inissisimasitsisoqalersinnaalluni
Sakkutuut pisuinnaat Illersornissaqarfimmeersut Issittup aputaani annerusumik iliuuseqarsinnaanngillat.
Sakkutuummi qallunaat Danmarkimi Sakkutooqarfimmeersut atortussaqaratillu sungiusarsimanngillat, Berlingske allappoq.
Berlingskemi atuaruk: Infanteri er bare ikke sagen i Grønland
Suliassanut naleqqutinngitsut
- Issittumi Sakkutuunut Upalungaarsimasunut peqataasussatut toqqarneqartussat atortoqassapput suliassanut naleqquttunik sungiusarsimasunillu, generalmajor Stig Østergaard Nielsen Berlingskemut oqarpoq.
Taanna Issittumi Sakkutooqarfimmut, Illersornissaqarfik suleqatigalugu Kitani Tunumilu sakkutuut pisuinnaat arlalissuit peqataaffigisaannik sungiusarnermik annertuumik qanittukkut ingerlatsisumut, pisortaavoq.
Atuaruk: Stor øvelse under pres af to overraskelser
Mestersvigimi suliassanik ingerlatsinermut pisortaq inerniliivoq, Garderhusarregimenti 'atortussanik pisariaqarnerpaanik' soorlu iluatigut atisanik oqortunik, attaveqaatinik taskinillu pitsaanerusunik aputikkut nunaannakkoornermut naleqquttunik amigaateqartoq.
Tamanna Sakkutooqarfimmit videoliani (allaaserisap matuma ataani) aamma takuneqarsinnaavoq.
Sungiusarnerit amerlanerit aaqqiissutissaasut
Illersornissaqarfik Arctic Responsemik sungiusaqatigiinnerup kingorna nalunaarpoq, maani suliassanik isumaginnittoqarsinnaassappat sakkutooqatigiiaanik marlunnik pingasunilluunniit ukiut tamaasa Kalaallit Nunaaliartitsisarnerit pisariaqassasoq.
Maaniinnanngitsoq kisiannili aamma Danmarkimi aningaasanut inatsisissat pillugit maannakkorpiaq isumaqatigiinniartoqarpoq. Taamaattumik Illersornissaqarfiup Berlingskemut taama nalunaarnera nalaatsornerinnaagunanngilaq, Illersornissaqarfik Danmarkimi naalakkersuisunut aamma marlussunnik kissaateqarmat.
Video takuuk: Frømandit Tunumi sungiusartut
Timmisartut aalajangersimasut kissaatigigaat
- Maannakkorpiaq imaani avatangiisinik alaatsinaannermut atatillugu qaammataasanik attartornikkut atuivugut, taakkunanngalu qaammatip ataatsip missaata matuma siorna immap qaavani uuliaqarneranik kalerrinneqarluta. Kisianni tiguinnaasunik amigaateqarpugut, soorlu timmisartumik, pissutsinik ullut tamaasa misissuisarnissamut, generalmajor Stig Østergaard Nielsen Berlingskemut oqarpoq.
Issittumi Sakkutooqarfik ullumikkut ukiup ingerlanerani piffisani sivikitsuinnarni Challengerimik aamma Herculesimik atuisinnaasarpoq.
Arctic Response pillugu allaaserisat tamaasa maani atuakkit
Matumani videokkut takutitassiaq Danmarkimi Sakkutooqarfimmit Arctic Responsemut atatillugu suliarineqarsimasoq takuneqarsinnaavoq. Tassani sakkutuut nunasiortut Garderhusarregimentimeersut Mestersvigimut angalanerat takutinneqarpoq.