Nunatsinniit EU-mut aallartitaq siullersaat eqqissivoq
Namminersornerullutik Oqartussani ukiorpassuarni atorfeqarsimasoq, Lars Vesterbirk arfininngornermi maajip 29-ani toqukkut qimaguppoq. Tamanna ernerata Kim Vesterbirkip Sermitsiaq.AG-imut uppernarsarpaa.
Jonathan Motzfeldimut ukiorpassuarni sullissisimasoq, Lars Vesterbirk toqukkut 75-inik ukioqarluni qimaguppoq. Lars Vesterbirk piffissami sivisuumi napparsimavoq. Ilaquttani ilagalugit eqqissilluni Danmarkimi arfininngornermi ualikkut toqukkut qimaguttoq, ernerata Kim Vesterbirkip oqaluttuaraa.
- Ilaquttaminiit qanigisaminiit kammalaatiminiillu najorneqarpoq. Amerlasuut takujumannillutik takkupput inuulluaqqusiartorlutik, Kim Vesterbirk Sermitsiaq.AG-imut oqarpoq.
Kalaallit Nunaata oqaaseqartartuat
Lars Vesterbirk atorfilittut ukiuni 30-init amerlanerusunit sulivoq. Nunarput nunarsuarmiooqatigiinnut saqquminerulernissaa taassuma annertuumik sulissutigaa, EU-milu Kalaallit Nunaatalu oqaaseqartartuatut ukiorpassuarni aamma sulivoq.
Lars Vesterbirk nunarsuarmi qeqertap annerpaaq EU-lu suleqatigiilernissaat sulissutigalugu 1980-ikkunni aallartippaa. Kalaallit Nunaat EU-mut attaveqaatai tunngavilerniarnerani saniatigut EU-mut aalisarnermut isumaqatigiissut naammassivaa. Taannalu isumaqatigiissut Nunatsinnut ukiorpassuarni annertuumik iluaqutaavoq.
Lars Vesterbirk Naalagaaffiup iluani EU-milu pingaaruteqarluinnarsimavoq. Atorfilillu kisiat Naalagaaffeqatigiit EU-lu attaveqarnerat kisiat suliarisimanngilaa. Taannami aamma Nunatsinni aatsitassarsiornissamut ilisimatuut misissuisinnaanissaat aamma sulissutiginikuuaa.
Lars Vesterbirk kikkunnit tamanit nuannarineqartuuvoq. Nunatsinni qanigisaminik ilaquttamisut isigisaminit ikinnguteqarpoq, toqunissanilu tikillugu Nunatsinni attaveqartuartarsimalluni.
Lars Vesterbirk pillugu paasissutissat:
- Lars Vesterbirk 1946-imi inunngorpoq, Kalaallit Nunaannilu peroriartorluni.
- Ataataa Kalaallit Nunaanni politimesteriusimavoq.
- Lars Vesterbirk inatsisilerituuvoq, Namminersornerullutik Oqartussani ministerrådiusimavoq. EU-mi Kalaallit Nunaata oqaaseqartartuartut aallartitatullu sulisimalluni. EU-mut aallartitatut aalisarnermut isumaqatigiissut Kalaallit Nunaanut iluaqutaasimaqisoq isumaqatigiissusiorpaa.
- Lars Vesterbirk Namminersornerullutik Oqartussani pisortaanertut atorfeqarsimavoq.
- Aatsitassarsiorfimmilu immikkoortortaqarfimmi pisortaasimalluni, tassani Nunatsinni aatsitassarsiornissamut misissuisoqalersinnaaneranik aamma sulissuteqarsimalluni.
- Namminersornerullutik Oqartussani Danmarkimi allaffeqarfimmi Københavnimiittumi pisortaasimavoq.
- Lars Vesterbirk Kalaallit Nunaaniit EU-mut Bruxellesimut aallartitatut siullersaavoq.
- Namminersornerullutik Oqartussani ukiuni 40-ni atorfeqarsimanerminut 2008-mi nersornaaserneqarpoq.
- EU-mut Nunatsinniit aallartitatut 2009-mi 61-inik ukioqarluni unippoq.
Ilisimatusarfimmi EU-mi Kalaallit Nunaat sinnerlugu sinniisuunini qanoq aallartissimaneraa uani takuguk:
Umiarsuup Hans Hedtoftip kivinera kammalaatigiit Lars Vesterbirk aamma Ejvind Christoffersen qanoq misigisimaneraat Kristeligt Dagbladip allaaserisimasaani uani atuarsinnaavat.