Nunatsinni uumasut ujarannguunnikut qaratsap ineriartorsimaneranik uissuumminartumik nutaarsiassartallit
Kalaallit Nunaata avannarpasinnerpaartaani uumasunik ujarannguunnikunik nassaarnerup qaratsap ineriartornerata oqaluttuassartaanik allannguisinnaavoq. Qarasaq 'pingasunut avitaq' minnerpaamik marloriarluni atassuteqanngitsumik pinngorsimasoq, nassaarnerup paasinarsisippaa.
Nunatsinni uumasunik ujarannguunnikunik 15-inik uissuumminartumik nassaartoqarnerata, qaratsap ineriartornera pillugu qangali nalornissutigineqarsimasumi paasinarsaataavoq. Videnskab.dk taama allappoq.
Uumasoq Kerygmachela ujarannguussimasoq nassaarineqarsimavoq – affassaasallit nutaaliaasut aallaaviat, ilaatigut sullernit, peqquit aamma aasiaat.
Affassaasallit qarasaat uagutsitut pingasunut agguarneqarsimapput, uumasorsiuut ineriartornermik suliaqartut taamaattumik ataatsimut qimerlullik aamma affassaasallit siuaasaqarnersut isumaliutigisimavaat.
- Affassaasallit aamma qimerlullik qarasaat pingasunut avissimasut imminnut atanngitsumik pinngorsimasut maanna oqaatigisinnaanngorparput, Bristol Universitymi Tuluit Nunaanni qallunaaq palæontologi Jakob Vinther ilisimatusartoq taama oqarpoq.
Nassaat paarilluakkat
Kerygmachela ilisimatuunit ilisimaneqareerpoq, kisianni taakku ujarannguussimasut taama paarilluagaatiginerat asseqanngilaq, isaat, timaasa atortui aamma qarasaat takuneqarsinnaallutik.