Uuliasiorneq
Nunatsinni uuliasiorneq akerliuffigineqarpoq
Tunup avannaata imartaani sajuppillatsilluni misissuinissanut nutaanut Greenpeacep akerliuniarnera Helsinkimi aallartinneqarpoq
Akerliuniat Greenpeacemeersut finskit umiarsuaannut sikunik aserorterummut ´ OTSO´ -mut ikisimapput, aasaq manna sajuppillatsitsilluni misissuinissamut, sikunik asertorterutip sapaatip akunnialunngui qaangiuppata peqataaffigisassaanut, akerliuniarlutik, avatangiisinik illersuiniaqatigiiffik taamatut paasissutissiivoq.
Ukiut arfinilissaa tulleriisiinnarlugu
Ukiut arfinilissaa tulleriisiinnarlugu umiarsuarnik Tunup avannaaliartoqassaaq, tamaani immap naqqa assiliorniarlugu, taamaasillutillu tamaani uuliasiorluni qillerisoqalissagaluarpat aallarnisaataasumik misissuillutik. Greenpeacep imaq tamanna sunnertiasorujussuartut taavaa.
Ulorianartulik
– Immami sikoqaqisumi uuliasiorluni qillerisoqanngilluinnartariaqaraluarpoq, pingaartumik Tunup Avannaanisut sumiiffimmi taama mersernartoqartigisumi, tamanna sikoqartuaannartuummat qillerinerit immikkut ulorianartoqarmata. Tamatuma saniatigut qularnartoqarpoq tamanna uuliasiortunut qaqugumulluunniit pilerinartunngussanersoq, Greenpeacemi suliniuteqarnermut pisortaq Sune Scheller tusagassiorfinnut nalunaarutikkut erseqqissaavoq.
Siuariarfissaqanngilaq
– Naalakkersuisut paasisariaqarpaat sajuppillatsitsilluni misissuinissanut akuersissuteqartuaannarneq siuariarfissaqanngitsoq, tamanna uumassuseqarnermut naggataatigullu nunarsuarmi silap pissusianut erloqinartumik ajornartorsiutaammat, taanna nangilluni allappoq.
Arferit ajoquserneqarsinnaapput
Immap naqqanik assiliorneq pisarpoq umiarsuup nipiliuutinik kalinneratigut, tamakkualu immap qaavata atinnguani qanngortitserujussuartarput. Greenpeace naapertorlugu nalunaarusiap 2015-imeersup takutissimavaa sajuppillatsitsilluni misissuinerit arlalinnik erloqinartunik kinguneqaateqarsinnaasut, pingaartumik arfernut.
Nipiliuutinit qanngortitsinerujussuit arferit tusartaasaat ajoqusersinnaavaat, attaveqaqatigiissinnaanerat akornusersorsinnaallugu, nalinginnaasumik uumaffimminnit qimagutsissinnaallugit, piaqqiornerat akornusersorsinnaallugu aammalu sikup ataani pisarineqarsinnaanerannik imaluunniit nunamut tipisoorsinnaanerannik ulorianartorsiornerat annertusisinnaallugu, illersuiniaqatigiiffik allappoq.