(U)sikkert
Nunatsinni uuliakoortoqassagaluarpat upalungaarsimasoqarnerpa
Uuliakoortoqassagaluarpat kina akiliissava. Højesteretsadvokat Nicholas Symes isumaqarpoq Danmark. Illersornissamut ministeri isumaqartoq Kalaallit Nunaat
Kina eqqortumik oqaluppa immikkut ilisimasalik imaluunniit ministeri?
Assigiinngitsunik tusarliisoqarpoq Kalaallit Nunaata imartaani uuliakoortoqassagaluarpat kikkut akiliisussaanerannut tunngatillugu.
Kalaallit Nunaat pillugu inatsisini immikkut ilisimasalik højesteretsadvokat Nicolas Symes oqarpoq, uuliaskoortoqaraluarpat saliinermut akiligassaq qallunaat akileraartartuisa akilissagaat.
Illersornissamut ministeri Nick Hækkerup, Socialdemokraterne paarlattuanik isumaqarpoq. Taanna MetroExpressimut oqarpoq:
- Kalaallit namminersornermik ingerlatsilernerannut atatillugu imaani uuliasiornermi uuliakoortoqassagaluarpat namminneq akisussaaffigilernikuuaat. Taamaattumik uanga naalakkersuisoqarfimma ataanni inissisimanngilaq Kalaallit Nunaanni misileraalluni qillerinerni upalungaarsimaneq aamma sillimaniarneq, taanna oqarpoq.
Nassuiaalli taanna Nicholas Symesimit ilumuunnginnerarneqarpoq:
- Namminersorlutik oqartussat nunami immamilu akisussaapput. Kisianni qillerinerit imartami akisussaaffiup avataaniittumi inissisimapput Illersornissamullu ministeriaqarfimmit akisussaaffigineqarlutik.
Danmark akisussaaffimminik tigusisariaqarpoq
Greenpeacemit Sermitsiaq.AG-mut oqaaseqaatikkut ernummatigineqarpoq, qallunaat naalakkersuisuisa akisussaaffimmik timarratiginnillutik Kalaallit Nunaannut akisussaatitsiniaanera:
Kalaallit Nunaanni saliinissamut inuttassaqanngilaq taamaattumik qallunaat naalakkersuisuisa akisussaaffitsik tigusariaqarpaat upalungaarsimasut atorsinnaasut saqqummiullugit. Naggaterpiaatigut pinngortitaq ajorsartuusussaavoq, uuliasiorluni qillerinerit aallartippata upalungaarsimanermik akisussaaffik tigujumaneqanngitsoq. Tamanna ernumanartorujussuuvoq.
- Allaanngilaq upalungaarsimaneq asuleerneqartoq. Uuliasiorluni qillerinernik aarlerinaateqarsinnaasunik aallartitsisoqarpat upalungaarsimanerlu akisussaaffigineqarusunngippat pinngortitaq immerutigineqassaaq. Mexicop Kangerliumanersuani ajunaarnersuarmit ilikkagaqartoqannginnami?, Niels Fuglsang Greenpeacemi qallunaat issittoq pillugu suliniartuisa ittuat oqarpoq.