Tamarmik akiliisalissapput
Nunatsinni umiarsualiviit ingerlanneqarneranni piffik nutaaq aallartilerpoq
Tallimanngorneq aallarnerfigalugu angallatit tamarmik, Nuup Umiarsualiviani aningaasarsiorfiunngitsumi taleqqasut, akitsuummut akiliisalissapput
Nuummi umiarsualivik, umiarsualivinni angisuuni nutaajusuni siullersaalluni atuisartunut akiliisitsisalissaaq.
Umiarsualivissarsuarlu nutaaq, Sikuki, sanaartornermut pilersaarutit malillugit aatsaat ukiaru ammassagaluartoq, umiarsuarnut tamanut atuisartunut akiliut tallimanngornermi juulip aallaqqaataani atuutileriissaaq.
Tamarmik akiliisassapput
Sikuki Nuuk Harpourip Nuup Umiarsualivia tigppagu, nunatta oqaluttuarisaanerani piffik nutaaq aallartissaaq.
Juulip aallaqqaataanit umiarsualivimmik atuisut tamarmik akiliisalissapput.
– Kulturikkut allanngornersuussaaq, taamatulli allannguuteqarnissamut tunngavissaqarpoq, Sikuki nittartakkamini allappoq.
–Selskabi piginnittumit, Namminersorlutik Oqartussanit, tapiiffigineqarani ingerlassaaq. Tamanna Inatsisartut aalajangernikuuvaat, Sikuki Nuuk Harbour A/S-imut umiarsualivinnullu Inatsisartut inatsisaasigut.
Akitsuummit ilaatinneqanngitsut
Ersissanngilatilli ilaqutariinnguanut akiligassamik nassinneqarnissannut.
Angallatit nuannaariutit, angallatit nuannaariutit talittarfianni Iggiaaniittut, imaluunniit illoqarfimmi allami kisarsimasut, amerlanerpaatigut akitsuummut akiliisinneqartassanngillat, Sikukip qullersai Sermitsiaq.AG-mut oqaluttuarput.
– Immikkoortitsisoqartassaarli, assersuutigalugu angallatit nuannaariutit anginerusut nunanit allaneersut eqqarsaatigalugit.
Angallammilli nuannaariummik Nuup Umiarsualivianiititaqaraanni tallimanngornermit akitsuummut akiliisoqartalissaaq.
Akitsuutit amerlanerusut
Atuisartunut akiliut naatsorsorneqartassaaq angallatip nioqqutissanik usii bruttotonsit naapertorlugitd, akiliinikkullu ullut sisamat angullugit umiarsualivimmi taleqqasoqarsinnaavoq.
Containerit, aalisakkat assartukkallu annertussusaat malillugit tamarmik immikkut akitsuuteqartinneqassapput.