Nunatsinni sumiorpaluutit katersorneqartut
Ilisimatusartut nunatsinni sumiorpaluutit katersorpaat misissoqqissaassallugillu. Neriuutigineqarpoq oqaatsit kulturikkut eriagisassatut nukittorsarneqarnissaat.
Kujataani innuttaasup Tunumiusut oqalunnikkut qanoq paaseqatigisinnaatigivaa? Oqaatsit ataasiakkaat sumiorpaluutit atorlugit qanoq assigiinngitsigippat? Aamma oqaatsit misissoqqissaarneritigut qanoq nukittorsarneqarnerusinnaappat?
Nunatsinni Danmarkimilu ilisimatusartut nunatsinni sumiorpaluutinik maanna katersipput.
Katersinermi immiussineq atorneqarpoq oqaatsillu atorneqartut allattugaatigilertussanngorlugit suliarineqarlutik.
Ilisimatusarluni suliaq Ilisimatusarfimmit, Nunatta Katersugaasivia Allagaateqarfialu, Københavns Universitetimit aamma Danmarkimi nationalmuseummimit suleqataaffigineqarpoq.
Sumiiffiit arfineq-pingasut katersiffigineqarput
Sumiorpaluutinik katersinermi tikitassat arfineq-pingasut ilisimatusartunit toqqarneqarsimapput.
Ukuusut:
- Aasiaat
- Ittoqqortoormiit
- Nanortalik
- Nuuk
- Upernavik
- Uummannaq
- Qaanaaq
- Tasiilaq
- GKalaallisut sumiorpaluutinik immiussinikkut immiussanillu allattuinikkut neriuutigineqarpoq suliniut Kalaallit Nunaanni oqaatsinut tunngatillugu kulturikkut kingornussarsianut tapiissutaalluassasoq – kalaallisullu oqaatsit qanoq atugaanerannik katersugaateqarneq ullumikkut siunissamilu pingaaruteqangaassaaq, Ilisimatusarfimmi aamma Københavns Universitetimi institut for Nordiske Studier & sprogvidenskabimit ilisimatusartoqatigiit allapput.
Aasianni nunaqarfinnilu Akunnaaq, Ikamiut aamma Kitsissuarsuit sumiorpaluutinik katersineq 3. februar tungaanut maanna ingerlanneqarpoq.