Nunatsinni suliffeqarfiit aalisarnermik ingerlatsisut annersaasa ilaat Sulisitsisunut ilaasortaajunnaarpoq
Niisa Trawlip Sulisitsisut kattuffiannut ilaasortaajunnaarniarluni aalajangerneranut, ilaannut iluaqutsiisarnermik allanullu ikiuisannginnermik pissuteqarpoq. Naak soqutigisat ilaatigut aporaaffeqartaraluartut, Sulisitsisut ilaasortanut tamanut sullissisuusoq, kattuffimmi pisortaq oqarpoq.
Niisa Trawl Sulisitsisut kattuffiannut ilaasortaajunnaarpoq. Piginnittoq, Carl Christensen, Sermitsiaq.AG-mut taama ilisimatitsivoq.
- Aningaasat ikinngitsut tassunga akiliutigisarpavut, taasarialimmillu pissarsissutiginikuunngilagut, taama isornartorsiuivoq.
Niisa Trawl Sulisitsisunut ilaasortaanerminut ukiumut 250.000 koruuninik akiliisarpoq. Sulisitsisuni pisortap, Christian Keldsenip, taama nalunaaruteqartoqarnera uggoraa.
- Ilaasortavut ilaasortaajumajunnaaraangata ajuusaarutigiuaannarparput. Tassami ingerlatseqatigiiffiit amerlanerusut ataatsimoorneranni, nukittunerusumik oqariartuuteqarsinnaavugut.
Soqutigisanik suliaqarneq siunnersuinerlu
Kisianni oqariartuutit naammaginartumik nukittussuseqarsimanngitsut, Niisa Trawlip piginnittua isumaqarpoq.
- Kattuffimmut arlaleriarluta ikiorneqarnissamik ujartuisarpugut, kissaatigisatsinnillu ikiorneqarnissaq pissarsiarisimanagu isumaqarpugut, tamannalu ilaatigut maanna kilisaataatigisatsinnit pisassiissutinik pissarsinissaraluatsinni pissarsinngitsoornitsinnik kinguneqarpoq.
Christian Keldsenip suliat aalajangersimasut oqaaseqarfigisinnaanngilai, taakku ilisimannginnamigit, kisianni Sulisitsisuni ilaasortaaneq siunnersorneqarnermut taamaallaat tunnganngitsoq naqissuserpaa.
- Soqutigisanik suliaqarnerup aamma siunnersuinerup akornanni oqimaaqatigiissaarisoqartuaannarpoq. Siunnersorneqarnissamik soqutigisaqarnerugaanni, sumiiffinni amerlasuuni pisiarineqarsinnaavoq, kisianni aamma uagutsinni soqutigisanik suliaqarneq akiliiffigineqartarpoq. Suliarisartakkagut tamaasa oqaluttuarisinnaanngilakka, kisianni pisortanut nunatsinnilu inatsisiliortut oqaloqatigineqarneranni pingaarutilittut suleqataavugut, taanna oqarpoq.
Aqutsisuni katiterunneq
Suliffeqarfiit ilaasa soqutigisaat allanit suliarineqarnerusarnerat aamma isornartorsiorneqarpoq. Tunup sineriaani saarullittassiissutinut nutaanut atatillugu taama pisoqartoq, Carl Christensen isumaqarpoq.
- Allaanngilaq Sulisitsisut kikkut pisassiissuteqarfigineqarnissaannut isummersimasoq, taamaattussaanngikkaluarput, Carl Christensen oqarpoq.
Polar Seafoodip soqutigisai kattuffimmi pingaarnerutinneqartut, taassuma ilaatigut oqaatigaa, tassani Henrik Leth sapaatip akunnerata naanerani kingullermi Sulisitsisut siulersuisuini siulittaasuuneranut innersuussivoq, taanna aamma Polar Seafoodimi siulersuisuni siulittaasuuvoq.
Henrik Lethili ataatsimeersuartoqalerpat tassani Michael Binzerimit kingoraarneqassaaq, Krissie Berthelsen Winbergillu Sulisitsisuni siulittaasuuffik atorfigilerpaa.
Sulisitsisut paasinninnerat naapertorlugu oqartussat inatsimmi atuuttumi aalajangersarneqarsimasut malinneqannginnerat pissutigalugu, Tunumi pisassiissutinut tunngatillugu iliuuseqarluni aalisarnermut naalakkersuisoqarfik attaveqarfiginiarlugu aalajangerneqarsimasoq, Sulisitsisuni pisortaq, Christian Keldsen oqarpoq.
- Taamaalilluta aamma inuiaqatigiit nakkutilliisoraatigut, taamatut pisoqartoq paasigaangatsigu qisuariartarpugut. Suliat ataatsimut isigalugit suliaqartilluta ilaatigut ilaasortatta akornanni soqutigisat sammivii assigiinngissinnaasarput. Amerlanertigullu isumagisinnaasarpagut, ilaasortagullu paasinnilluartartut misigisarparput.