Nunatsinni silap kiatsikkiartornera takornariaqarnerulersitsisinnaavoq

Kalaallit Nunaanni takornarissat amerliartorput.

Tassami Kalaallit Nunaat 2014-imi 79.885-inik tikeraartoqarpoq, 2015-imilu 87.237-nut amerleriarput, 2016-imilu 96.234-ullutik.

Taakku suli amerleriarsinnaapput, takornariaqarnermut Issittumullu tunngasunuut Aalborg Universtitetimi ilisimatusartoq Carina Bregnholm Ren isumaqarpoq.

- Inuit sermersuaq aannginnerani takorujusuppaat, taanna danskit aviisiannut Kristeligt Dagbladimut sisamanngornermi oqarpoq.

Atuaruk: Ilisimatuut: Najugaqartut isumassarsiaasa takornariaqarneq kivissinnaavaat

Suliffissuaq
- Nuna tamakkerlugu aalisarnikkut suliffissuaqalerneq assigalugu, nuna tamakkerlugu takornariaqarnikkut suliffissuarmik ineriartortitsisoqalersoq takusinnaavarput, Carina Bregnholm Ren erseqqissaavoq, siornalu nuna tamakkerlugu takornariaqarnermut periusissiamik saqqummiisoqarsimasoq oqaatigalugu.

Nalunaarusiami 'Kalaallit Nunaanni takornariaqarnermik ineriartortitsineq: Qulaajaaneq isumassarsiornerlu' marlunngormat saqqummersumi ilaatigut atuarneqarsinnaavoq, najugaqartut takornariartitsisartut 75-85 procentiisa siunissaq isumalluarfigigaat.

- Silap pissusiata allanngoriartornera ajunngitsutut isiginiarnissaa ajornakusoorsinnaavoq, kisianni Kalaallit Nunaanni unammilligassat periarfissanut mumisinneqarnerat assersuutitut uani takuneqarsinnaavoq, naak imminut assortuukkaluartoq, Carina Bregnhom Ren Kristeligt Dagbladimut oqarpoq.

Atuaruk: Takornarialerinermi pilersaarut aallartinneqarpoq

Tusagassiutitigut saqquminerulerneq
Kalaallit Nunaanni takornariaqarnerup ineriartornerunissaanut siulittuutit nunatsinni takornariaqarnermut siunnersuisoqatigiinni, Visit Greenlandimi nuannaarutigineqarput.

Tassani aamma nunanit tamalaanit Issittumut soqutiginninnerulernerup takornariat nunatsinnut tikinnerusalernerat malugineqarpoq.

- Ataatsimut isigalugu Kalaallit Nunaat tusagassiuutitigoornerulernikuuvoq. Silap pissusiatami allanngoriartorneri ersarissumik takuneqarsinnaasut sumiiffit ilagaat. Kalaallit Nunaanni sermit nungukkiartortut takuneqarsinnaapput, tassa silap pissusiata allanngoriartorneranut takussutissa ersarissoq, Visit Greenlandimi pisortaq Anders Stenbakken oqarpoq.

Atuaruk: Qeqertarsuarmut ukiuunerani takornariat

Suliffissanik pilersitsisinnaasoq
Kalaallit Nunaanni sumiiffinnut arlalinnut angalanissaq ajornannginnerulernikuuvoq, nunaniillu assigiinngitsorpassuarnit takornarissat pilerisaarnissaat ukkatarineqarnikuuvoq. Takornarissat amerlanerulernerat suliffissanik amerlanerusunik pilersititsisinnaavoq, Anders Stenbakken nassuiaavoq.

- Takornariaqarneq inuussutissarsiut kiffartuussinerujussuuvoq. Takornariaqarnermi ineriartortoqaleraanga asigiinngitsunik takornariartitsisartunik, angallatinik ingerlassisartunik aamma akunnittarfinni sulisunik pisariaqartitsisoqalertarpoq, taanna Kristeligt Dagbladimut oqarpoq.