Nunatsinni sakkutuujusussaatitaaneq? DF akuersaarpoq - IA isumaqarpoq pisariaqanngitsoq

Illersornissaqarfimmi assigiinngiiaassuseqartitsiniarluni arnat sakkutuujusussaatinneqartalernissaannut Danmarkimi politikkikkut maanna amerlanerussuteqartoqalerpoq. Kisianni Kalaallit Nunaat qanoq pissava, sakkutuujusussaatitsineq atulersinneqassava?

Danskit naalakkersuisuini partiit tamarmiusut arnanut sakkutuujusussaatitaanermik atulersitsinissamut isumaqatigiittut, sisamanngormat saqqummiunneqarpoq.

Ullumikkut piumassutsiminnik ilanngussinnaapput, angutitut aggersarneqartanngillat. Allannguineq Illersornissaqarfimmut nukittorsaallunilu assigiinngiiaassuseqartitsilissasoq naatsorsuutigineqarpoq.

- Illersornissaqarfimmi assigiinngiiaassuseqartoqarnissaa pitsaalluinnartoq isumaqarpunga. Illersornissaqarfiup sakkutuuinik ilinniarsimasunik sulisussaqarnerulissaagut, illersornissaqarfimmi pisortaq Flemming Lentfer, sisamanngornermi taama oqarpoq.

Tamatumunnga atatillugu illersornissaq pillugu oqaaseqartartut arlallit kiisalu kalaallit Folketingimut ilaassortat, sakkutuujusussaatitaaneq Kalaallit Nunaannut aamma atuuttariaqarnersoq Sermitsiaq.AG-p apeqquteqarfigai.

DF: Naleqquttoq

Dansk Folkepartip illersornissamut oqaaseqartartua Alex Ahrendtsen akuersaarluinnarluni akivoq:

- DF-imit Kalaallit Nunaannut Savalimmiunullu sakkutuujusussaatitaanermik atulersitsinissaq akuersaarparput. Naalagaaffeqatigiinnut illersornissamut akisussaaffimmik kivitseqataanissaat naleqquppoq, politikeri allagaqarluni taama akivoq.

Kalaallit Nunaat aatsaat piumappat, sakkutuujusussaatitaaneq atulersinneqassasoq, Rasmus Jarlov Konservativeneersoq isumaqarpoq.

Sakkutuujusussaatitaaneq pillugu apeqqut Inatsisartunit aalajangiiffigineqartariaqartoq, nunatsinnit folketingimut ilaasortaq Aaja Chemnitz (IA) isumaqarpoq, siullermillu nunatsinni sakkutuujusussaatitaanermut misilitsinnissamut periarfissaq atulerseqqinneqartariaqartoq, tamanna ukiakkut 2021-mi kalaallit tungaannit itigartitsissutigineqarpoq.

IA: Sakkutuujusussaatitaaneq pisariaqanngitsoq

Sermitsiami ullumikkut allaaserisaq saqqummertoq naapertorlugu upernaamut sakkutuujusussaanermut misilitsinnerit nunatsinni ingerlanneqaqqissapput.

2024-mit Issittumi tunngaviusumik ilinniakkamik Kangerlussuarmi neqerooruteqalissaaq.

- Angutinik arnanillu sakkutuujusussaanermik ingerlasserusuttunik amerlasuunik peqartoq isumaqarpunga, Aaja Chemnitz allappoq, nangillunilu:

- Inuit sakkutuujusussaaneq aamma Illersornissaqarfimmi ilinniarneq aqqutigalugit anguniarneqartariaqarpoq, taamaalilluta kalaallinik ilinniarluarsimasunik Issittumi Sakkutooqarfimmi sulisinnaasunik sulisussaqarsinnaassaagut. Misilittakkakka naapertorlugit inuit sakkutuujusussaatinneqartariaqanngillat. Amerlasuut kajumissutsiminnik ilanngukkusupput, tamannalu inuusuttortatsinnut ukiumi ilinnianngiffeqartunut aningaasarsiorluartitsillunilu imminut piumaffiginnilersitsisarpoq.

Aki-Matildap kalaallisut ilinniagaqarnissaq tapersersorpaa

Kalaallip Folketingimut ilaasortap aappaa, Aki-Matilda Høegh-Dam (S), sakkutuujusussaaneq pillugu apeqqummut isumminngilaq, taarsiullugu Illersornissaqarfiup ataani upalungaarsimanermut ilinniarfinngortussamut innersuussivoq, taanna nunatsinni pilersinneqartussaavoq:

- Nunanut Allanut tunngasunut Naalakkersuisoq Vivian Motzfeldt illersornissamut ministeriusimasoq Morten Bødskov, upalungaarsimanermut ilinniarfimmik pilersitsinissamut isumaqatigiissusioqatigaa.

- Kalaallit innuttaaasut ataasiakkaat ilinniakkamik toqqaasinnaanissaat tapersersorpara. Ilinniakkap kalaallisut Erfalasorpullu atorlugu ingerlanneqarsinnaanissaa pingaaruteqarpoq, Aki-Matilda Høegh-Dam allappoq.

Illersornissamut ministerip Jakob Ellemann-Jensenip (V), arnat sakkutuujusussaanerat pillugu apeqqut sapaatip akunnerani matumani saqqummiuppaa. Kalaallit Nunaanni sakkutuujusussaaneq pillugu illersornissamut ministerimit Sermitsiaq.AG oqaaseqartitsiniarsarivoq, saqqummiunnissaali sioqqullugu akissuteqanngilaq. Danmarkimilu naalakkersuisut sinnerinit partiinit pingasunit illersornissamut oqaaseqartartut pingasut aamma suli akissuteqanngillat.

Powered by Labrador CMS