Nunatsinni pissutsit nutaat atuutilersut
Filmimi piviusulersaarummi nutaami februaarimi Kuannersuarni suliniut pillugu innuttaasunik ataatsimiititsinissat tungaannut pisut malittarineqarput. Taamanimiilli suliniummut isornartorsiuisut malunnaateqarluartut ilaat arlallit pissaanermik ingerlatsisunngorsimapput, maannalu siunissami Kalaallit Nunaanni aatsitassarsiornikkut suliniutissanut sinaakkusersuilersimallutik.
Eqqumiitsuliortoq Paninnguaq Lind Jensen aamma David Heilmann Ottossen Kuannersuit pillugit suliniummut tunngasumik piviusulersaarummik filmiliorsimapput minutsinik 48-nik takissusilimmik februaarimi 2021-mi innuttaasunik ataatsimiititsinissap tungaanut Narsami innuttaasut akornanni suliniummut ernummatiginninnernik sammisaqartumik, aviisi Sermitsiaq allappoq.
Kuannersuarni suliniut pillugu oqallinnerit taamanimiit qinersisoqartussanngorneranik naalakkersuisoqatigiinnillu nutaanik IA-mit siulersorneqartunik kinguneqarsimapput. Piviusulersaarut “White Paper”-imik qulequtserneqartoq aggustip 14-iani Youtubemut inissinneqarpoq taamanimiillu 2000-eriarluni aaneqarsimalluni.
Filmimi Paninnguaq Lind Jensenip ilaatigut Urani Naamimi oqaaseqartartuusimasoq Mariane Paviasen, ullumikkut IA sinnerlugu Inatsisartunut ilaasortaasoq tamatumalu saniatigut Inuussutissarsiornermut Aatsitassanullu Ataatsimiititaliamut siulittaasuusoq, apeqqarissaarfigaa.
Februaarimi innuttaasunik ataatsimiititsinermit aamma takutitassiaqarpoq, tamatumanilu Greenland Mineralsimeersut, Namminersorlutik Oqartussaneersut kiisalu siunnersortip arlaannaannulluunniit attuumassuteqanngitsup Narsamiipput, Urani Naamimeersunillu akerliussutsimik takutitsisunit isorinnittorujussuusunit naapinneqarlutik.
Allaaserisaq tamaat uani Sermitsiami pisiarisinnaasanni atuaruk: